June 12, 2019

Jop ka Myrjai haka U Adelbert Laloo Memorial Trophy ka WJDSA

Jowai: Ka 1^st U Adelbert Laloo Memorial Trophy kawa man leh ka 3^rd Division Football Tournament ka WJDSA, ynne da pynman ar tylli ki yalehke.

Haka yalehke wa nyngkong hapyrdi ka Myrjai waka Mookyrdup, ka Myrjai da jop ko da 1-0 da ka kool wa thap u Wompher Chyrmang haka minit wa 68.

Haka yalehke wa ar, ka Loompyrdi Iongpiah da yachem ko waka Youth Welfare Pynthorlangtein wei ka yalehke da kut ko da 1-1.

Yaka Pynthorlangtein da thap kool da u Pyllaitmitre Lipon haka minit wa 42 katwa yaka Iongpiah da thap da u Nakisa oo Niangti haka minit wa 63.

Mynstep ka 13 tarik ki yalehke u pynman hapyrdi ka Riatsaliya Mihmyntdu pyrchah yaka Khliehmyntdu Neinshnong heipor 1:30 i sngi wei pynbood won saka Pateinki Sabah pyrchah yaka Lumchyrmang Mihmyntdu heipor 3:30 nohchariñ ka sngi.