Ka Ridamaya Passah kawa na Jowai da man ko kam kawi na ki le ngut wa jop yaka Sunsilk Serum Mega Miss North East 2024 kawa da pynman ynnin i miet ha Guwahati, Assam wei da chah jied ko leh wow mihkhmat yaka ri India haka yakob Top Model of the Universe 2024 kawa daw pynman ha ri Turkey.
Waroh kiwa da yaleh da em ki 56 ngut heiwa da jied ya 12 ngut ki Semi Finalist kiwa da mih rynsan ynnin heiwa 5 ngut toh kiwa na Meghalaya, 3 ngut na Assam, 2 ngut na Arunachal Pradesh wa mar kawi na Nagaland wa Manipur.
Na ki 12 ngut won da jied sa 5 ngut ki Finalist heiwa ka Ridamaya da man ko kawi na kini deilang wa 2 ngut na Assam wa mar kawi na Arunachal Pradesh wa Manipur.
Da em leh ka kylla wa jubab yeiwa kylli kiwa bichaar wei hadien ini da pynbna ya ki 3 ngut kiwa jop.
I rukom pynbna ya kiwa jop ymtoh deiwa em wa yoh nyngkong, wa ar, wa le tangwa waroh le kam kiwa joplang (Co-Winner).
Kamtæ ka Ridamaya Passah na Meghalaya da man ko kam kawi na kiwa jop, neiæ ka Monica Konjengbam na Manipur waka Dipti Basumatary kawa na Assam.
Ka Monica Konjengbam da chah jied ko leh wow mihkhmat yaka ri India haka Miss Continental World 2024 kawa daw pynman ha Thailand.
Ini leh da man i sien wa nyngkong wa ki kynthai kiwa jop ya kani ka yakob da yoh ki leh wow lai mihkhmat yaka ri cha baar ri ha kiwi won ki jait yakob.
Hachwa ini da em leh i e khusnaam neibynta ki Subtitle heiwa ka Emichwa Daka B Ladia kawa man leh kam ka Miss Jowai wa kattæ da yoh ko yei naam Miss Glamorous.
Ka Ridamaya Passah toh kawa da dep jop ya kiwa boon ki yakob miat kynthai kam ka Miss Iongpiah, Miss Chrysalis, Trychi Queen, Beauty Queen of Northeast, The Loft Winter Queen wa Miss Northeast. Neitæ haka Fresh Face Hunt da yoh 1st Runner Up ko, haka Miss Blue Life leh 1st Runner Up, haka Miss Shillong leh 1st Runner Up katwa haka Miss Meghalaya da yoh 2nd Runner Up ko.
Discussion about this post