Ka Shillong Cricket Association (B) da jop suk ko yaka East Khasi Hills da 134 Run haka Zone 1 ka Group A ka Inter District U-19 Boys Cricket Tournament wa pynman ha Khliehtyrchi daka AJCA neibynta ka MCA ynne ka sngi.
Ya ka kylla-khlem da jop daka Shillong CA (B) wei da jied ko wow Bat wow nyngkong, heiwa da yoh ko 242/7 na waroh ki 30 Over. U Manthan Dey (76) wa u Kshitij Singhania (79) daman ki kiwa da kamai Run rap boon ya ka SCA (B). Neiliang ka East Khasi Hills won, u Raj Kishor Yadav da yoh u pynhaap chi Wicket na ki 5.4 Over.
Hawa beh won ya ka thong, ka East Khasi Hills CA da ye ko u kamai du 108 Run deiwa dooh ko waroh ki 10 Wicket ha ka 28.3 Over. U Hameki K Susngi toh uwa da lehbha da ka Bat heiwa da ye u kamai 17 Runs naki 22 bol. Neiliang ka SCA (B), u Vivek Kumar Ray da ye u u khur 3 Wicket deiwa e 21 Run na ki 6 Over.
Ya i naam Man of the Match da yoh da u Manthan Dey yeiwa kamai u 76 Run.
Haka Zone 2 won kawa da pynman ha Tura kawa da toh u sdang ynne ka sngi hapyrdi ka Tura District CA waka South Garo Hills da hap wow ieh khlem yaleh neidaw wa joor u slap.
Mynstep haka Group B ka Zone 1, ka South West Khasi Hills daw yachem ko waka East Jaiñtia Hills, katwa ha ka Zone 2 won, ka North Garo Hills daw yachem ko waka East Garo Hills.
