Ka Simi Khongthiang kawa chna phlim wa pawnaam ka Ri-loom Jaiñtia da jop ko yei naam Best Director haka Prag Cine Awards 2024, Northeast India kawa da pynman ynnin ka sngi ha Jorhat, Assam.
Yeini i naam da yoh ko neibynta ka phlim thymme yong ka kawa tip kam ‘Ka Chithi’ kawa da pynlait paidbah chwa u kut u 2023.
Kani ka phlim da chah jied namo da yoh Nomination ko wow yakhun ha 3 tylli ki jiat kyrdan (Category) kitæ ka Best Film, Best Director wa Best Actor ha kani ka Prag Cine Awards 2024.
Ha kani ka Award da em boon tylli ki phlim kiwa da yakhun yow jop ya kiwa boon ki kyrdan wei ya ka Simi ini da man i sien wa ar wa da chah jied ko wow yaleh yei naam Best Director heiwa i sien wa nyngkong toh ha u snem 2018 tangwa ym em jop ko.
Ka Simi da pyntip ko wa kani toh ka Award wa nyngkong wa da jop ko cha baar ka jylla wei da man iwa sñiaw sarong wow jop leh ya kani ka Award wa heh dooh ha Northeast.
Discussion about this post