Jowai : Kawi na ki dhab tem sur na Jowai kawa tip kam “The Lynx” da rah ko yei naam wa jop ha ka Nongkhnum Spring Break Festival 2016 wa pynkut ha kani ka 19 tarik wa dadep.
Ha kani ka lympung yakop tem, ka The Lynx da pynrem ko ya ki 17 tylli ki dhab wa wan chim bynta. Neilaing ka dhab da e khublei ko leh ya ki le tylli ki dhab na ri-loom Jaiñtia wa wan chimbynta ha kani ka yakop kitæ toh ka Doom of Malice, Soul Revival wa Magnificient.
Uwa tem Bass yong kani ka dhab u Marco da yoh u leh yei naam Best Bassist.
Neiliang ka The Lynx da ong ki wa ini waroh man i kam i dak wow pynsakahiat wa napoh ri-loom Jaiñtia boon kiwa em yei sap tem wa u rwai.
Deini i jop ka The Lynx da rah ko ya ka song poisa wa T. 50,000 kiwa wan wa ar ka Circle Gates yoh ki T. 25,000 katwa heiwa le da yoh da ka Symphonic Illusions wa ka song poisa wa T. 15,000.
Ya ka The Lynx da seiñ ya ka ha u snem 2009 kiwa kynthup ya u Levi kam u nongrwai, u Diam u wa tem Guitar heijooh i por leh u nongrwai, u Micheal kam u lead guitarist, u Marco uwa tem Bass wa u Sam uwa tem drum.
Kini ki 5 ngut da ya maya lok ki nadooh wa dang khian ki wei da man ki leh ym du tang kam ki dkhot kani ka dhab tem, ki da sniaw yajan ki kam kiwa chi yung chi sem.
Ki jait sur wa ka-it ki u tem u rwai toh RnB/Rock/Hardrock. Ki nongrwai wa e mynsien ya ki u chna sur toh Rush, Iron Maiden, The Eagles, CCR, Black Sabbath wa kiwi.
Discussion about this post