Ha ki yalehke ka Open to All T20 Cricket Tournament 2021 yong ka AJCA kiwa pynman ynne ka sngi, ka Umchangiar waka Khliehtyrshi Sports Club da yoh ki yei jop.
Haka yalehke wa nyngkong, ka Umchangiar da jop ko yaka Rising Star da 3 Run.
Ka Umchangiar da jop ko yaka kylla-khlem wei da jied ko wow Bat nyngkong heiwa da kamai ko da 124/9 na ki 20 Over. U Lakhon Bareh da kamai u 34 Run (1×4 wa 2×6), u Heipormi Laloo 25 Run (1×4 wa 1×6). U Firstborn Dkhar wa u Kyrmen Suchiang yong ka Rising Star da yoh pynlang ki mar 3 Wicket samen na ki 4 Over. Ka Rising Star hawa beh yei thong da ye ko u kamai 121/9 na ki 20 Over. U Sani Nongtdu da kamai u 48 Run (6×4 wa 3×6), u Dayman Shullai won da ye u kamai 37 Run (3×4 wa 3×6). U Heipormi Laloo, u Teilang War, u Heisar Bareh wa u Kune Lato yong ka Umchangiar da yoh ki u pynhaap mar 2 Wicket samen na ki 4 Over.
Haka yalehke wa bood, ka Khliehtyrshi Sports Club da jop ko yaka Moodymmai da 121 Run.
Ya ka kylla-khlem da jop da ka Khliehtyrshi Sports Club wei da jied ko wow Bat nyngkong wei da ye ko u kamai 225/3 na ki 20 Over. U Daurupaia Bang da kamai u 135 Run (6×4 wa 16×6) khlem haap, u Success Rymbai won da ye u kamai 27 Run (3×4 wa 1×6) khlem haap. U Aries Pyrtuh, u Daowan Passah wa u Richel Passah yong ka Moodymmai da yoh ki mar 1 Wicket samen na ki 4 Over.
Ka Moodymmai hawa beh yei thong da ye ko u kamai 104/10 na ki 15.1 Over. U Levastar Phawa da kamai u 21 Run (2×4 wa 2×6), u Daowan Passah 20 Run (3×4 wa 1×6). U Tumi Ryngkhlem yong ka Khliehtyrshi Sports Club da yoh u pynhaap 4 Wickets na ki 4 Overs, u Rainbow Phawa won da yoh u 3 Wicket na ki 3 Over.
Ka yalehke ha ka 29-03-2021 u man ko hapyrdi ka Khimusniang waka Moodymmai heipor 9:00 waje i step.
