Ka Umchangiar waka Moodymmai, da khur ki yei naam jop ha ka lympung yalehke T20 Open to All Cricket Tournament wa da pynlai daka All Jaintia Cricket Association ha madan Jrisaleiñ ynne ka sngi.
Ha ka yakhun wa nyngkong ynne ka sngi hapyrdi ka Chutwakhu wa ka Umshangiar hei por 9:00 waje i step, ka Umshangiar da ye ko u pynrem yaka Chutwakhu. Ha kani ka yalehke ya ka kylla khlem da jop da ka Chutwakhu wei da jied ko wow Bat nyngkong heiwa da ye ko wow kamai 154 Run na ki 20 Over deiwa dooh 6 Wicket. U Sambor Chyrmang da kamai u 45 Run (5×4 wa 4×6), u Heimonmi Nongpluh 41 (6×4 wa 1×6) khlem haap.
Neiliang kiwa kawang bol ka Umchangiar, u Heisar Bareh wa u Heipormi Laloo da yoh ki wow pynhaap mar 2 Wicket.
Ka Umchangiar da ye ko wow beh ya i thong ha ki 20 Over deiwa kamai ko 156 Run deiwa dooh 8 Wicket. U Marshal Pariat da kamai u 46 Run (6×4 wa 3×6), u Dauru Lato won da kamai u 37 (6×4 wa 2×6). U Unipaya Pala wa u Heimonmi Nongpluh yong ka Chutwakhu da yoh ki u pynhaap mar 2 Wicket na ki 4 Over.
Ka yakhun wa ar ynne ka sngi da pynman hapyrdi ka Hills United Cricket Club waka Moodymmai, heiwa ka Moodymmai da jop ko da 31 Run. Ya ka kylla khlem da jop da ka Moodymmai wei da jied ko wow Bat nyngkong deiwa kamai ko 166 Run na ki 20 Over deiwa dooh 7 Wicket. U Pyndap Lamin da kamai u 75 Run (8×4 wa 5×6). U Chanmiki Ryngkhlem wa u Lekini Jat da yoh khur ki mar 3 Wicket yaka Hills United Cricket Club. Ka Hills United Cricket Club hawa kdong ya ka thong da ye ko u kamai 135 Run naki 19 Over deiwa dooh lut ya waroh ki Wicket. U Yoohimitre Patwet da yoh kamai u 55 Run (7×4 wa 3×6). U Daowan Passah yong ka Moodymmai da khur u 4 Wicket na ki 4 Over.
Ka yakhun wa nyngkong mynstep ka 17 tarik heipor 9:00 waje i step u man ko hapyrdi ka Ummulong wa ka Rising Star, katwa ka yakhun wa bood u pynman hapyrdi ka 4-Mowkaiaw United pyrchah yaka Khliehtyrshi Sports Club.
