Ka West Jaiñtia Hills Police da man ko kawa da embhah wow yoh rah yei naam jop ya ka Ka 8th U Kiang Nangbah Memorial Inter Office Football Tournament 2021 kawa da pynman da ka Meghalaya State Government Employees’ Federation, Jaiñtia Unit ha Kiang Nangbah Stadium, Jowai heiwa ynne da pynman ya ka yakhun Final pyrchah ya ka PHE heiwa uwa yalehke ka PHE u Armolando Shullai da toh thap kool bakla u ha ka minit wa 40.
Ka yalehke da man ko kawa yatoh bor nadooh ka kylla step hadooh ka kylla miet wei waroh arliang da pyrchang ki wow chim ya kiwa boon ki kabu wow thap kool, tangwa da toh i bok i nasib yong ka chnat pulit wow yoh rah naam jop dooh ha ka yalehke wa kut da 1-0.
Ha kani ka sngi najrong wa da saam ya ki khusnaam cha kiwa jop wa kiwa rem, da saam leh yei naam Best Goalkeeper wa da yoh da u Ebormitre Sutnga uwa yalehke ka PHE, arngut kiwa da yoh yei naam Top Scorer wa kynthup ya u San Hame Bareh wa u Ending Born Lyngdoh uwa yalehke ka PHE, katwa yei naam Player of the Tournament da yoh da u Everest Ryngjah uwa yalehke ka chnat pulit.
