Ynne da man ko kawa sahkynmoo ya kiwa chna phlim chna sur ka ri India heiwa da jop ki ar tylli ki Oscar ha ka 95th Academy Awards wa da pynman ha Los Angeles ynne ka sngi.
Ka phlim RRR da jop ko yei naam Best Original Song yei sur “Naatu Naatu” kawa man ka phlim Telegu wa da Direct da u SS Rajamouli deiwa pynrem i ya kiwi de kiwa em pyrtuid wow yaleh ya ini i naam kam i sur ka Lady Gaga i “Hold My Hand” yong pa phlim Top Gun: Maverick, i sur ka Rihanna i “Lift Me Up” yong ka phlim Black Panther: Wakanda Forever wa i sur yong ka phlim Everything Everywhere All At Once wa pyrtuid “This is Life” wa i “Applause” na ka phlim Tell it like a Woman.
I sur Naatu Naatu toh iwa da chna da u M.M. Keeravani katwa ki kyntien won da thoh da u Chanrabose wei da dep jop i leh yei naam Best Original Song ha ka Golden Globe Awards, ha ka Critics’ Choice Awards, Hollywood Critics Association wa kiwi kiwi de ha uni u snem hi.
Ka phlim Documentary kawa da pynmih na India hi kawa e pyrtuid Elephant Whisperers wa da Direct da ka Kartiki Gonsalves da yoh ko yei naam Best Documentary Short Subject wei kani ka Documentary toh kawa chaphang ki chi kurim kiwa da hap wow psan ya u khon hati uwa da dooh noh ya ka bei u pa.
Kani ka phlim toh kawa da riñ ha Mudumalai National Park kawa em ha Tamil Nadu wei da pynyoo ko leh yei rukom im ki jaitbru ri-loom kamjooh i yatoh yong ki waka bei rymaw.
