Shillong: U Batsrang A Sangma waka Darishisha Iangjuh da jop ki ha ki jar jiar ki kyrdan yong ki haka yakob phet kawa tip kam ka Shillong 10K Run kawa pynman ynne ka sngi ha Shillong kam chibynta i lehkmen yaka Olympic Day.
Ka Meghalaya State Olympic Association (MSOA), kam chibynta wow lehkmen yaka Olympic Day 2019, da dep pynman ko yaka Inter-College Sports Quiz Competition, ka wa jop daka St. Anthony’s College, ha U Soso Tham Auditorium haka 18 tarik kani ka tayaw wei ynne won da pynman yaka yaphet wa jrong 10km ‘Run for Fun’.
U Sports & Youth Affairs Minister u Banteidor Lyngdoh da em u kam u kongsan wei da kaweh lama u ya kani ka yaphet heipor 7 waje i step kawa da chimbynta palat 300 nadooh ki khynnah hadooh kiwa da tymmen.
“Uni u snem sñiawkmen oo wow yoo wa em ar chah kiwa chimbynta,” da ong u Bantei Lyngdoh. Da yaroh u leh yaka Kmoin Wahlang, kawa em palat 70 snem kawa phet Marathon na South West Khasi Hills, kawa da pynku yei pyrtuid ka jylla deiwa lai chimbynta ko ha kiwa boon ki Marathon hapoh ka ri.
U montri da phet u leh chibynta kani ka ‘Run for Fun’ deilang wa ki dkhot ka MSOA, wa emlang u Working President u John Kharshiing waka East Khasi Hills Deputy Commissioner ka Matsiewdor War Nongbri.
Haka yaphet 10km Race, u Batsrang A Sangma da yoh nyngkong u deiwa pyndep ha i por 35 minutes, 11.20 seconds, iwa rap suki ya i por uwa jop ynnin u snem uwa pyndep heipor 34:44.12, wa jop da u Mudang Omo. Hei wa ar da yoh u NP Singh uwa pyndep heipor 35:21.90, hei wa le da poi u Emphius Nongrum uwa pyndep heipor 35:48.33.
Ha yong ki kynthai won da jop da ki jooh ki le ngut kiwa jop ynnin u snem heiwa ynnin u snem da jop ka Pynhun Shulet wa ar ka Darishisha Iangjuh wa leh ka Dateibankynmaw Marwein.
Ha kani ka kynti won ka Iangjuh da yoh nyngkong deiwa pyndep yei phet heipor 44 minutes, 12.96 seconds, iwa smat ya i por ynnin u snem 2018 (44:15). Ka Marwein da yoh wa ar ko heipor (46:06.29), katwa ka Shulet da yoh wa le ko (48:37.57).
Ya kiwa yoh nyngkong da yoh ki mar T. 10,000 samen wei da e sñiawbha leh ya kiwa wan chimbynta.
Discussion about this post