U Daniel Wahlang waka Balarisha Thyrniang da jop ki ha ka Shillong 10K Run kawa da pynman ynne i step kawa man leh ka sien wa soo wa da pynman ya kani ka yakob phet pyllah.
Ya kani da pynman kam chibynta wow lehkmen ya ka International Olympic Day, kawa da jied ya ka 23 tarik kawa man leh ka sngi wa da seiñ ya ka International Olympic Committee ha u snem 1894. Kani ka yaphet toh kawa jrong 10 km wei da pynman lang ya ka ha waroh ka pyrthai deiwa jied ya ka sngi Saturday wa yajan dooh wa kani ka sngi.
Ha kani ka Shillong 10K Run da wan wow chimbynta nadooh ki khynnah hadooh ki waheh kiwa da thap pyrtuid lyngba ka Website ka Meghalaya State Olympic Association wei da em leh kiwa da wan wow e pyrtuid ynne hi i step.
Ya kani ka yaphet da kaweh lama da u Montri ka chnat Sports and Youth Affairs Minister, u Shakliar Warjri deiwa emlang ka Director of Sports and Youth Affairs, ka Isawanda Laloo, u MSOA General Secretary, u Finely L Pariat wa kiwi de ki heh ka MSOA waka DSYA.
Neiliang u Montri hawa e yei klam da ong u wa kamwa 80% ki khynroo ym em yalehke ki, kamtæ da pynchlur u wow pynjra yei doh i pran yow yoh yei chait i khiah.
I yaphet da sdang na Polo Ground Complex deiwa lai cha 4th Furlong, BK Bajoria School, PGT College, Shillong Commerce College, Don Bosco Square, Laitumkhrah Police Point, Laitumkhrah Police Beat House, Fire Brigade, Dhankheti, Barik Point, Civil Hospital, State Central Library, Meghalaya Secretariat, nakhmat ka yung krehkaam ka Deputy Commissioner, i thaw sah u Lat, na nan Polo, i thaw sah u Montri Rangbah wei da pynkut biang ha Mandan Polo.
Neiliang ki chynrang da yoh nyngkong da u Daniel Wahlang, da bood hei wa ar da u Wolbetstar Ramsiej wa hei wa le da u Sainkupar Jyrwa. Ha ki kynthai won da yoh nyngkong da ka Balarisha Thyrniang, hei wa ar da ka Bandasharai Marwein katwa hei wa le won da yoh ka Marqueenless Ramsiej.
Kiwa yoh nyngkong da yoh ki T. 7,000 samen, wa ar T. 5,000 samen katwa kiwa yoh wa le da yoh ki mar T. 1000 samen. Da e leh mar T. 1000 samen cha kiwa yoh hei wa soo hadooh hei wa phra.
Da e khusnaam wa kyrpang cha kitu kiwa da em 50 snem chaneiñ heiwa u Badon Singh Tham da man u kam uwa yoh nyngkong uwa da em 51 snem i rta uwa da yoh wa ar ha u snem 2022. Hei wa ar da yoh u Pynshngainlang Dkhar katwa hei wa le da yoh u Kedrick Kharpor.
Ha ini i jooh i kyrdan ya ki kynthai won, ka Bitiris Marbaniang da yoh nyngkong ko, hei wa ar ka Starina Jasain katwa hei wa le da yoh ka Snora Rani.
Neiliang u Montri leh da phet lang u chibynta kani ka Shillong 10K deilang wa ki dkhot ka MSOA.
