Shillong: U MLA na Shella uwa man leh u President ka UDP, u Dr. Donkupar Roy da chah jied u kam u Lamphang wa 16 yong ka yung dorbar chna aiñ ka jylla kawa chiphaw yong ka Meghalaya Legislative Assembly.
U Dr. Donkupar uwa na ka liangsynchaar ka Meghalaya Democratic Alliance (MDA) wa yahkhmat da ka NPP, da jop u da 35 la 20 Vote ya u kyrtong ka liang pyrchah u Winnerson D Sangma ka Congress ha ka Election jied Lamphang kawa man ynne ka sngi.
Napyrdi ki 57 ngut ki MLA kiwa da jied ya u Lamphang wa thymme 35 ngut na ka liang synchaar da jied ki ya u Dr. Donkupar Roy katwa 20 ngut da jied ki ya u Winnerson D Sangma.
Ha kani ka yajied, neiliang u Dr. Mukul uwa jop na ar Constituency da yoh thap Vote u du chisien, kawi ka Vote da shah kyntait ko katwa neiliang u MLA ka KHNAM na Shillong North, u Adelbert Nongrum ym em wan u cha kani ka yajied.
U Dr. Donkupar da jop u ynru sien kam u MLA ka Shella, wei ha kini ki 25 snem wa dadep, da man u kam u Chairman waphær waphær nadooh kam u Chairman ka State Planning Board, u Montri sorkar, u Symbood Montri Rangbah wei kamjooh kam u Montri Rangbah ka jylla ha ki snem wa dadep.
Waroh ki dkhot ka yung dorbar kiwa yachim bynta da pynsñiaw ki yei yaroh wa yoh lamphang da u bru uwa da biang kyrdan, uwa chemphang wei uwa tip kammon u pynlai ya ki kaam hapoh ka yung dorbar.
U Montri Rangbah ka jylla u Conrad K Sangma da ong u wa i em slem wa i chkheh u Dr. Donkupar kam u Lamphang daw mih chooh chooh i man em akor wa i kyrdan ka yung dorbar kawa da pawnaam ha ka ri.
Katwa u Dr. Mukul Sangma uwa yahkhmat ya ka liang pyrchah da ong u wa kam u MLA ha kini ki phaw snem, u Dr. Donkupar da yachem u chiboon i eh i khoo ha ka kaam saiñ hima ha ka jylla wei napyrdi waroh ki MLA yajan bha u wa u Dr. Donkupar.
Hawa klam hadien wa chah jied kam u Lamphang, u Dr. Donkupar Roy da ong u wa ym yachah chiliang u hawa pynlai u kam u Lamphang ka yung dorbar.
Da ong u wa ha ki snem wa dadep, em ki khep heiwa ka chuki u Lamphang da man ko ka laad wow pynhiar sorkar wei wow pynman blangkñia wei ini ktah i ya ki dkhot wa ya ka synchaar paidbah.
Da ong u wa ha kini ki 25 snem tam ha ka saiñ pyrthai yong oo, toh sadu ka chuki Lamphang ympu jooh em yoh u wow ksoh.
Ha iwi i liang, kamwa da kyrpaad da ki MLA wa dang thymme wow esikai, u Dr. Donkupar da ong u wa daw pait u yeini wei daw hikai u ya ki MLA wa dang thymme wow tip ki ya ka rukom man hapoh ka dorbar wei wow yania hajrong ki phang wa ktah ya ka jylla.
Discussion about this post