U khynroo wa tip kam u Nangbha Rymbai uwa na Panaliar, Jowai da jop u yaka yakob Khasi Traditional Show Online 2023 wa da pynman da ka Khasi Indigenous Foundation.
Hei wa ar da yoh ka Melisha Shylla kawa na chnong Umsiang Mawpdeng, Ri-Bhoi District wei hei wa le da yoh da ka Dawanrihun Lyngdoh kawa na Mawlong Diengsiar, East Khasi Hills District.
Kani ka yakob man ko kam chibynta wow pynneh pynsah ya ka distur riti u paaid ka Ynñiaw Trep wei ya ki khusnaam kiwa jop waka song poisa da dep e cha kiwa jop da ki Director yong ka seiñ kitæ u Precious Stone Sumer, u Niman N Shadap, u Seaspiar Tangliang wa u Pyniolad Kyndiah.
Neiliang u Niman N Shadap da kyrpaad wei kyntu joor u ya ki khon khynroo khyllood wow mih ki chakhmat wow chibynta ha kiwon kiwon ki rynsan kiwa pynyoo yei naam, ki riam tynre yong ka jaitbru yow bna naam i hakhmat ka pyrthai wei wym toh u mylliñ yei tynre yong i lada em i ha iwon iwon i thaw leh.
Da ong u leh wa kiwa jop ymtoh wow sñiaw sarong næ wow khyllew tangwa wow man ki kam ka nongmuna wa bha cha kiwi won khnang wa kiwi u bood ki ya ki dak kjat yong ki wei wow nang kreh chitom ki neini chakhmat wei ya kitu ki wym poi cha ka thong leh ym toh u dooh mynsien wei wow nang kreh chitom chooh chooh neibhah ka Khasi Indigenous Foundation daw pynman ko ya kam kini ki jait kaam waphær waphær neini chakhmat.
Da pynkut u deiwa ong wa toh u em ka mynsien maya uwi ya uwi wei wow maya uwi ya uwi kam chi payu para khnang wa ka jaitbru yong i u nang ku ko ha waroh ki liang.
Discussion about this post