Jowai : Ka Dorbar Chnong Tuber ynne ka 18 tarik da jied thymme ko ya u Waheh Chnong wa thymme yong ka hadien wa da kut i por u Waheh Chnong warim, u ma Embi H. Sana u wa da man Waheh Chnong la 5 snem.
Ya ini i jied Waheh Chnong da leh ha khmat ka Yung Dorbar Chnong hei emlang u Dolloi wa chi por ka Elaka Jowai u ma Puramon Kynjin kam uwa da pynkup bor da ka JHADC wow pyllai ya ini i jied Waheh Chnong.
Ha chwa u pynman ya ini i jied Waheh Chnong thymme da em leh ka yalang heiwa da puræ ya ki rukom krehkaam (General Report) yei lut i sep ka chnong nadooh u snem 2012.
U Waheh Chnong warim da pynsniaw u cha ki paidbah ya waroh ki kaam wa da dep leh u yow pynku ya ka chnong nadooh i pynyoh surok, ki skim penchon ya kiwa tymmen, i yada ya ka rymaw, i khooid i suba ka chnong wa kiwi kiwi.
Ha kani ka jied Waheh Chnong da em le ngut ki kyrtong kiwa wan cha khmat kitæ toh u ma Embi H. Sana, ma Graham Lyngdoh wa u ma Phrang Dkhar. Tangwa u ma Phrang Dkhar ran dien u chwa u jied thymme deiwa ong wa daw yang chwa u yei por yong oo u man Waheh Chnong wei da kyrchan u ha kani ka kynti ya u ma Graham Lyngdoh.
Kamtæ ha pyrdi u ma Lyngdoh wa u ma Sana u Dolloi da e lad u ya ki paidbah u jied ya u Waheh Chnong deiwa ap yei kyriaw wa khlan dooh hadien wa dep pynbna yei pyrtuid u kyrtong. Ka sur ki paidbah da kyrchan joor ki ya u ma Lyngdoh.
Da e lad leh ya ki kynthai u kyriaw ki du ki hadien wa em ki kyrpad wa ym ye u sniaw yei sur yong ki manda nujor wa ki chynrang. Ha kani leh ki sur yong ki kynthai da kyrchan ki ya u ma Graham Lyngdoh.
Deini i sur, u Dolloi da pynbna u wa u ma Graham Lyngdoh da man u kam u Waheh Chnong wa thymme ka Dorbar Chnong ka Tuber hadien wa dep pyntikna wa waroh ki kyrtong ym em kreh ki kam ki Gram Sevak katkam ka kyndon wa booh da ka JHADC. Kamjooh leh ka samoi yong u Waheh Chnong thymme u man ko le snem.
Discussion about this post