Kam chibynta yong ka Rashtriya Ekta Diwas namo ka National Unity Day, da pynman ya ka Run for Unity ynne ka sngi ha East Jaiñtia Hills District da ka yung krehkaam ka District Sports Officer, East Jaiñtia Hills District, chirup wa ka yung krehkaam u Deputy Commissioner.
Kani ka yakob phet da pynman neibynta ki chynrang wa kynthai heiwa da em hadooh 100 ngut kiwa chimbynta.
U Deputy Commissioner ka District, Khliehriat, u A. Baranwal, da kaweh lama u ya kani ka Run for Unity kawa da sdang na yung krehkaam warim u Deputy Commissioner Office, Khliehriat cha Rymbai PHC wei da uiñ biang cha i thaw wa sdang.
U A. Baranwal, chirup wa ka District Sports Officer, East Jaintia Hills District, ka Stephanie. M. Rapsang da saam ki ya ki khusnaam cha kiwa jop.
Ha ki chynrang da jop da u Wandame Dkhar na Jalyiah bood won sa u Kordor S Mannar na Narwan wa u Iakhut Dkhar na Cham Cham hei wa le.
Na ki kynthai won da jop ka Rosy Sana, bood sa ka Lamsuk Phawa, katwa ka Therisa Sana won hei wa le wei kini waroh toh kiwa na chnong Mukhaialong.
