Jop uwa na Mookyrdup ya ka Rs. 1 lak ka Lucky Draw ka Moosalyngkat

by Wyrta Staff

May 31, 2026

Reading Time: 2 mins read

Ka Dorbar Chnong Moosalyngkat ha ka 29 tarik uni u bnai da saam ko ya ka spong poisa cha kiwa jop ya ka Lucky Draw kawa da pynkhle ha ka 10-04-26 kam chibynta ka Fete.

Ya ka 1^st Prize kawa Rs. 1,00,000 da jop da u Kune Siangshai uwa na Moorkyrdup, Jowai, ka 2^nd Prize kawa Rs. 50,000 da jop da u Kamal Sharma uwa na Ladrymbai, East Jaiñtia Hills katwa ya ka 3^rd Prize kawa Rs. 30,000 ym pu em wa wan kam heiwa u Number wa pam toh 0490.

Ya ki Consolation Prize kiwa mar Rs.1000 kawi da jop da ka Diang Kyndait kawa na Moosalyngkat, Jowai, u Love Shylla na Wahiajer, u Iatha Chyrmang na Dulong, Jowai, ka Deiwi Passah na Iawmusiang, Jowai, u Francis Langlein na Chutwakhu, Jowai wa u Rejoice Gassah na Ummulong.

Ka Dorbar Chnong Moosalyngkat da pynsñiaw ko yei sñiawngooh ya waroh ki paralok parajor kiwa da e i kyrchaan hei wow pynman ya kani ka yaaw Fete kawa lai bait lai ryntih.