Jowai : Ka Max Autosprint Challenge wa pynman da ka East Jaiñtia Adventure and Motor Sport Association (EJAMSA) ynne ka sngi da poi ko cha wa kut hadien ar sngi.
Kani ka yakop pynyoo sap yah kari wa pynman ha madan Lyngkeiñ, Ialong da wan chimbynta kamwa 33 ngut kiwa yah kari na Assam, Meghalaya, Arunachal Pradesh, Nagaland wa na Delhi da man ko kawa jop heiwa da boon ki paidbah da wan sakhi ya ka.
Hadien ar sngi ka yakop ynne ka sngi u Amanpreet Ahluwalia da jop u ha pyn le tylli ki kyrdan yakop wa kynthup ya ka kari SUV, ki kari wa khlan bor 1300 cc cha neiñ wa ki kari wa embor 1300 cc cha poh.
Ha ka kyrdan SUV u Amanpreet da pyndep u nadooh wa sdang hadooh wa kut heipor dei yong minit 2:28:78 da pynbood da u Ewellson Lyngdoh uwa na West Jaiñtia Hills heipor 2:35:50 wei da yoh wa le u Anguso Sekhose deiwa pyndep u hei por 2:38:09.
Ha ka kyrdan 1300 cc cha neiñ da jop biang u Amanpreet Ahluwalia dei por ha i minit 2:24:44 pynbood biang da u Ewellson Lyngdoh heipor 2:24:85 wei da wan wa le da u Brandon Bazely heiipor 2:25:15.
Ha ka kyrdan 1300 cc cha poh u Amanpreet da jop biang u deiwa pyndep u na wa sdang ha wa kut heipor wa kheiñ da i minit 2:25:41 pynbood biang da u Ewellson Lyngdoh da i por yong oo wa 2:26:69 wei da yoh wa le da u Barbdon Bazely uwa pyndep heipor 2:27:13.
Ha waroh ki kyrdan uwa yoh nyngkong da yoh u T. 50,000 wa ar T. 30,000 wa le T. 20,000. Ya ki khusnaam da wan saam da u J.I.Slong kam u kongsan ha kani ka sngi.
Na ri-loom Jaiñtia da wan chim bynta u Ewellson Lyngdoh, u Da-oo-hi Swer, u Reuben Roy Suchiang, u Rimioo Sympli, u Juhhipaya Palem, u Besterwell Sympli, u Mihsalan Bareh, u Bribisoncy Simply wa u Haunie Rymbui.
Also Read: Sdang ka yakop pynyoo sap yah kari ha Ialong
Discussion about this post