Ka 6th Schedule hi wa lah ya ka Article 371, ong u Vincent Pala

U President ka Meghalaya Pradesh Congress Committee (MPCC), u Vincent H Pala da ong u wa ka 6^th Schedule yong ka riti synchaar ka ri India, rap khlan ko bar ya ka Article 371 yong ka riti synchaar.

“Ka Article 371 yaphær ko na ka 6^th Schedule. Ka Article 371 i bor chong ko ha ka sorkar jylla neibhah wa e bor kyrpang ko ha ka sorkar jylla, katwa i bor ka 6^th Schedule toh hajrong ka riti ka dustur, i khyndaw u chyiap kiwa haap hapoh i pynlai yong ki District Council”, da ong u Vincent Pala hawa klam ynne ka sngi.

Ini i ong u Vincent toh hawa kylli hajrong i lai ka Voice of the People Party (VPP) ha kani ka Election MDC wa katni wow yalap ha ka yurim wow dawa pynkrehkaam ya ka Article 371, deiwa kam wa toh ka aiñ kawa khlan wow yada yei mantre yei khyndaw u chyiap waka dustur riti yong kiwa chong chnong ka jylla.

“Lada jied ya ka VPP ye wow rai wow wanrah ki yeitæ ym tip O, i ka Congress sñiaw i wa ka 6^th Schedule toh u em ko, ki District Council toh u em wei wow pynneh ki, i toh u pynbha i ya ka 6^th Schedule wei toh leh u pynneh pynsah ya ka dustur riti yong i. I toh u chna i ya kiwa boon ki aiñ wow pynneh pynsah yeiwa em”, da ong u President ka MPCC uwa man leh u MP warim ka Shillong.

Related posts

U pdiang ya waroh nadooh u Mukul, u Charles kiwa kwah u psiah biang cha ka Congress: Dr. Chellakumar

January 11, 2025

Pynbna ka NPP sa 7 ngut ki kyrtong MDC

January 11, 2025

Da ong u wa ki paidbah kiwa jied ki ya kiwa mihkhmat hapoh ka ri Khasi-Jaiñtia hap ki wow e ya ka rai, “Lada i kwah i ya kani ka riti ka dustur, i khyndaw u chyiap wow e kti noh cha ka ka sorkar jylla næ wow neh wa ki waheh chong, ki Hima; i hap i wow e ka rai”, da ong u.

Da ong u leh wa katkam wa thooh bniah wa da leh da ka Congress, ka 6^th Schedule rap bha ko wei rap khlan ko chiboon ya ka Article 371.

“Wot ha Jammu & Kashmir kamjooh ha Arunachal Pradesh da kwah ki wow pynkrehkaam noh ya ka 6^th Schedule ha ki thaw wa da yoh ya ka Article 371. Ki paidbah hap ki wow pyrkhat lada u e bor noh ki cha ka sorkar jylla næ wow ksoh hi ha ki ya ka synchaar khadar”, da ong u Vincent.

Ha iwi i liang, u Vincent da ong u wa ka Election ha Meghalaya ymtoh kawa thymme, tangwa toh ka Election kawa ki paidbah jied ki iyi kwah ki.

“Nga yoo O yei rai ki paidbah ha ka Election MP, ha ka Election MLA wa ha ka Election MDC man ko jar jiar. Ha ka MP kiwa yaleh Election em ki du 5-6 ngut, katwa ha ka MDC kiwa yaleh Election em ki da ki spah ngut. Ka la-ær ka VPP ha ka Election wa dadep ym ktah ko ya ka Congress”, da ong u Vincent.