U MLA ka NPP na Nongstoiñ uwa man leh u dkhot yong ka ‘Expert Committee’ wow bichaar ya ka Land Bill yong ka KHADC, u Macmilan Byrsat da ong u wa ka Aiñ Khyndaw toh ka kular wa da booh da ka NPP ha ka Election MDC 2019, ya kawa da ye wow pynmankaam.
Da ong u wa hadien wa jop ya ka Election da yaklam u wa u CEM ka KHADC hajrong i emkaam wow pynman aiñ noh yei rukom ksoh khyndaw wow e yei yada wa kyrpang, hawa neiliang u CEM, u Teinwell Dkhar da mynjur wow thung ya ka Drafting Committee hapoh ka KHADC wei da khlieh da u CEM wa katni, u Titosstarwell Chyne.
Da ong wa hadien wa da mynjur da ka KHADC ya ka Land Bill, da phah cha ka chnat District Council Affairs wa ka chnat aiñ yong ka sorkar jylla, wei hadien wa katai ka aiñ da sahkut da jan chi snem, da lai u wow yaklam wa kiwa yahkhmat ka Party kiwa khlieh leh ya ka sorkar wow pynkynmoo wa ka aiñ khyndaw toh ka kular Election wa hakhmat dooh yong ka Party ha ka Election MDC 2019 yong ka KHADC wa JHADC.
Da khana u wa hadien ini, neiliang ka sorkar da thung ko ya ka Expert Committee yong ka chnat DCA, Law wa Revenue yong ka sorkar ya kawa oo leh da man dkhot u, wei kani ka Committee da bichaar wow phah ya ka KHADC wow pynbait ya ki kyndon wa ya tyngkhooh wa i yong ka sorkar wa yong ka KHADC, wei hadien wa da sahkut biang ka Expert Committee da bichaar wei da chim wa ka aiñ da biang wei phah yei e yumut wow phah noh cha u Lat ka jylla wow yoh yei mynjur.
U Macmilan da ong u wa em i pynbaad wa ka NPP da kamtre ko hajrong kani ka aiñ, tangwa da ong u wa i yong sakhiat wa kani ka phang toh kawa da kular Election ka NPP ha u snem 2019.
Heijooh i por da ong u wa ini i jop wow wanrah ya kani ka aiñ toh i jop yong ka jaitbru, heiwa da e khublei u ya waroh kiwa embynta wow kreh chitom nadooh ka KHADC wa na ka sorkar jylla.
