Ka 18 tarik u bnai September toh ka sngi wa khroo ya ki paaid wa ngait ka Balang Unitarian kiwa em ha Ri Khasi Jaiñtia wa Karbi neibhah wa ha kani ka sngi man-u-snem joh kynmoo warom ya ka sngi sdang yong ka Balang wa da seiñ da u Babu Hajom Kissor Singh Nongbri itæ toh ha u snem 1887, wei ha uni u snem ka Balang Unitarian da khynjoh ko cha u snem wa 138 i lai luti.
Wei kamwa ka Balang Unitarian ha Jowai toh ka seiñbei, i lehkmen kynmoo burom ya kani ka lyngkhooh dap snem leh man ko kawa chongkun dei chimbynta chitrhem ki paaid wa ngait nadooh ka yaseiñ step, ka yaseiñ sngi kamjooh heipor janmiet wa ki paidbah ya chimbynta ki hei lai Procession deiwa rahlang leh ki dongmusa ki Banner chirup i rwai tymbood luti.
U President ka Senglang Unitarian ha Ri Khasi Jaiñtia wa Karbi, u Marki Passah, ong u kani toh ka sngi wa khroo tam ha ki kam ki paaid wa ngait wei i wan ka Anniversary pynkynmoo ko yei kaamram wa toh u leh kam kiwa ngait katwa dang im ha sla khyndaw.
Khana u leh wa ha uni u snem ka Senglang da pynbait ko wow em ka jooh ka phang pyrdi ha warohlang kawa ong “Ka Anniversary Ka Jingkyrsiew Mynsiem”.
Lyngba kani ka phang pyrdi da pynsñiawthooh cha ki para wangait heiyatoh wa i sikai niam wei ka Anniversary ha uni u snem kyrsu ko ya ki mynsien, neibhah wa hei im bru boonsien ym ye u biang, i man tlot wei ym ye u pyndep yei phla niam.
Na itæ i daw ong u wa da booh ya kani ka phang yow kyrsu ya ki para wa ngait yow tip u sñiawthooh ki hadooh katwon kordor i sikai niam.
Heiyatoh wa i lai Procession ha kylleiñ ki bynta ka chong Jowai, ong u kani man leh chibynta u pynyooo cha ka pyrthai ya ki yurim i ngait yong ki, heiwa kam kiwa ngait ha kani ka sngi da yoh ki yei che mynsien wa da yoh 138 snem nachwa.
Discussion about this post