Jowai: Ka Ladthadlaboh Dorbar Chnong, Jowai, ynnin ka 28 tarik da pynman ko yaka yakob miat kynthai, bha chynrang neibynta ki khon khynroo khyllood ka Dorbar Chnong kawa tip kam ka Miss & Prince Ladthadlaboh 2019 ha Community Hall ka chnong.
Ha kani ka yakob da wan chimbynta 5 ngut ki chynrang wa 7 ngut ki kynthai na ki dong wa em hapoh ka Ladthadlaboh wa kynthup yaka Dongmihsngi, Lumpariat, Memory Colony, Salaroh, Tyndowapung wa Mookyrdup.
Chwa wow jied ya kiwa jop da kiwa bichaar wa kynthup ya u Riquoma Rq Laloo (uwa thoh kot kamjooh uwa chna phlim), ka Lameca Passah kawa jop yaka Miss Jowai 2018-19, Miss Tyrchi Queen 2018, Miss Hynniewtrep 2018 2nd Runner-up wa Miss Loompyrdi Iongpiah 2016, ka Isapaya Shullai kawa yoh Mrs. Shillong 2nd Runner-up 2019 heijooh i por ka Fashion Designer wa kawa sikai, da pynman ya le tylli ki kylla wa kynthup yaka Traditional Round, Casual Round wa Formal Round heiwa kiwa chimbynta da pynyoo ki ya i riam i bait wa ha rukom.
Chwa wow pynbna ya kiwa jop da pynbna ya kiwa rah ya i naam (Sub-title Award) heiwa yaka Miss Beautiful Hair da yoh ka Gardinia Era Synnah, Miss Ramp Walk da e cha ka Merika Lamare, Miss Fashion Icon da rah ka Avity Sana, Miss Beautiful Smile da yoh ka Manhakani Phawa katwa yei naam Miss Photogenic da yoh ka Paiadakahi Lhuid.
Hadien ini da pyndeiñ pangsnget yaka Avity Sana kam ka Miss Ladthadlaboh 2019 daka Miss Ladthadlaboh 2017 ka Lumlang I Ka Bareh. Ka Avity toh kawa sah ha Dongmihsngi wei i chnong tre ko toh na Mukhaialong. Yei wa ar da yoh ka Paiadakahi Lhuid kawa na Caroline Colony, wa le da yoh ka Manhakani Phawa kawa na Tyndowapung.
Ya i naam Prince Ladthadlaboh 2019 da jop u Saunipaia Plain uwa na Mookyrdup, wa ar da yoh u Dennis Esley Lyngdoh uwa na Caroline Colony, wa le da yoh u Lalrinzuala Thieite uwa na Ladthadlaboh.
Ya kiwa jop da yoh ki leh yaka song poisa.
Discussion about this post