Jowai: Kamwa jooh leh khlieh snem ha uni u snem ka Dorbar Chnong Panaliar daw pynman ko ya ka Baamphalar yong ka ha ka 29 wa 30 tarik uni u bnai, ha Yungwalieh ka Chnong.
Ha ka miet yong ka 29 tarik daw em ka lehke drama danda (Comedy) kawa pyrtuid Ham Pynjem.
Ya kani ka drama da pyntoh pyntne da u B. Lonely Phira, u Anewma Sumer, u Arwotki Sumer, u Careme Phawa, u E. Manbha Kynjin wa u Kaida Thma.
Kiwa embynta hei wow ak ha kani ka miet toh u B. Lonely Phira, u Melam Laloo, u R. Konel Phira, u Tammiki Rymbai, ka Phema Sumer, u Anthony Challam, u Heipor Laloo, ka Duki Kynjin wa kiwi kiwi.
Ha ka miet wa ar katæ ha ka 30 tarik daw em ka drama wa pyrtuid ka ‘Hima Iong Nga I Ryniein I Iong Pha’ kawa da pynwandur (Directed) da u Wingstone Rymbai.
Ha kani ka drama ki wow ak kynthup ki ya Samitre Laloo, u Sniriang Sumer, ka Syntu Paswet, u Barlymore Shylla, Nangbha Rymbai, ka Indira Shullai, u Careme Phawa, Embhah Mukhim, u Marjan Lakiang wa kiwi kiwi.
Kamtæ ka Dorbar Chnong Panaliar da kyntu ko ya ki khon ka chnong wa ki lok ki jor najan najngai wow wan sakhi ya kani ka lehke Baamphalar wa ar miet yong ka.
Discussion about this post