Ka CAA pynyap ko yaka Assam Accord: NESO

Jowai: Ka North East Students Organisation (NESO) da pynsñiaw ki yei pteiñ yong ki wow pyrchah yaka Citizenship (Amendment) Act (CAA), 2019, neidaw wa man ko i maa wa joor bha ya ki jaitbru khian paaid ki jylla ka thaaiñ mihsngi.

Ka NESO da ong ko wa thaaiñ North East em ko u khappood wa jrong wa pai wa 1,750 Km waka ri Bangladesh wei da maad ki yei wan psiah tooh nadooh wa yoh laitlooid ka India ha u snem 1947 wei hadien wa yoh laitlooid ka Bangladesh heiwa kiwa psiah cha Tripura wa Assam da joor bha ki ha u 1971. Ini da wanrah ko yei man khian paaid ki tre chnong kiwa da man du 30% donhi katni hei boon bru ha Tripura, ha ki 11 tylli ki District ka Assam ki tre chnong da man ki kiwa khian paaid.

Da ong leh waka CAA da pynyap ko yaka Assam Accord kawa da ya soi ha u 1985 heiwa da booh ya u snem ah pyrtuid namo ka Cut-off Date ha u 1971 tangwa ki kyndon thymme ka CAA da pyndooh ya ini iwa pynyoo yei wym burom ka sorkar India ya ki paidbah ka Assam wei yeini ym ye u pdiang. Kamtæ ka CAA u pynkhia chooh chooh ko ya iwa da joor chwa i psiah tooh ki nong Bangladesh.

Da pynkynmoo wa u Home Minister warim ka United Front Government, u (L) Indrajit Gupta, haka 6^th May 1997, da pyntip u ha dorbar ka Lok Sabha ya i em ki bru kiwa psiah tooh kiwa da jan poi hadooh chi klur ngut, ka Intelligence Bureau ha u 1998 da antad ko wa i em kiwa psiah tooh kiwa da chong chnong hadooh 1.1 klur wei na kini, kiwa boon dooh toh kiwa em haka jylla Assam wa West Bengal, ka Group of Ministers (GOM), haka bui (Report) yong ki heiyatoh waka “Reforming the National Security System” da pyntip paidbah ki wa haka 23 May, 2001, wa haka thaaiñ North East dang joor chooh chooh i wan psiah tooh kiwa da poi 1.2 klur ngut na Bangladesh nadooh u 1971. U warim u Minister of State for Home Affairs, u Prakash Jaiswal, haka 14^th July, 2004, da ong u wa em palat 1.2 klur ngut ki nong Bangladesh wa psiah tooh ha India, heiwa na kini, 50 Lakh da em ki ha Assam, 3,25,400 ngut ha Tripura, 59,000 ngut ha Nagaland wa 30,000 ngut ha Meghalaya. U warim u Minister of State for Home Affairs, u Kiren Rijiju, ha u 2016 da ong u ha Rajya Sabha wa da antaad wa ki nong Bangladesh da em ki 2 klur ngut.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kamtæ ka NESO da ong ko wa thaaiñ mihsngi da pyrchah ki ya kani ka aiñ kawa e yarap ya kiwa psiah tooh yow man tre ri ki wei ka sorkar heithaw wow phah liwan ya kini ki jaitbru da e sñiawbha yaki da i hok wow man kam ki tre ri.

Da pynkut deiwa kylli wa ka sorkar India yachah ko ya ki tre ri namo ya kiwa na baar ri kiwa chong chnong pyrchah yaka aiñ.