Jowai : Ka chnong Syndai ka wa em kamwa 48 KM na Jowai toh kawi na ka thaw lai paitke kawa yoosuk wei kamjooh ka chnong wa dap da ki parom u warim u wajah nadooh ki parom u syiem Jaintia hadooh ki thaw lehniam ki Hindu.
Ha ini ki por tlang toh i por wa biang bha u lai cha kani ka chnong khamtam ha kini ki bnai wa da dep siang rong ya ka surok nadooh na Amlarem hadooh ha Syndai.
Ki thaw wa riñ sawari hapoh ka chnong Syndai toh ar tylli ki krem wa suk bha u psiah kiwa ym em kam ki tiar ki tar psiah krem lait noh ki tyslait wow ba luti. Katkam ki parom warim da ong wa u syeim jooh murieh u ya kiwa ha yung ha sem yong oo ha kini ki krem ha ki por yaleh thma.
Ka krem wa man bna naam ha kani ka chnong toh ka Krem Syndai ka wa tip leh kam ka Krem Jogindra næ ka Krem Sooty da ki phareng neidaw wa sah ki dak wa yong wa mih nei thang ya ki mombati, ki dhup na ki sadhu wa wan lehniam hapoh kani ka krem. Hadooh kini ki por ha u bnai wa ar man u snem dang wan ki Hindu yow leh niam hapoh kani ka krem nadooh na Nepal. Ya kani ka krem ye phi ka u chem deiwa lai na ka luti lai kjat wa khut ki tre chnong kam ka luti Muktapur. Ha ka lad nynkong dooh wa chem phi heipor hiar na kani ka luti cha liang tidiang toh ka luti cha ka Krem Syndai.
I thaw psiah cha kani ka krem man i iwa suk wei daw chem nyngkong phi yei thaw lehniam ki Hindu nadooh na ki por u syiem Jaintia. Cha ka liang timun em i thaw psiah yillu cha kani ka krem wei wa ye u lai chapoh chooh kani ka krem kamwa 30 mitar khlem emkaam ya ki tiar ki ki tar psiah krem.
Hapoh kani ka krem daw chem phi ya ki wa boon jait ki moo wa mih na tnoom kamjooh na khyndaw kiwa da wan dur da ki milian snem, em kiwa man kam ki chrood em ki wa man kam ki moopynyieñ em kam ki pyrda yung.
Em hi leh sa kawi ka krem ha Syndai hadien ka Upper Primary School ka wa ong ki tre chnong ka wa miat chooh chooh wei kawa suk u psiah u mih na ka kamjooh.
Hadien wa mih phi na ka Krem Syndai lai biang cha ka jooh ka lad wa khlad nyngkong phi neitæ hiar biang sa kattu katni mitar donhi hei thaw wa em uwi u dieñ wa heh cha liang tidiang daw chem phi ya i yung syiem wa jooh chong ngiah u syiem Jaintia. Ya ini i yung da chna da ki moo blok khelm em khyndaw bilat. Em leh ki dieñ wa heh wa mih na tnoom ini i yung yoo phylla wa ym hap ini i yung. Ha khmat ini i yung em i thaw leh puja ki sadhu.
Rap ha wah kani ka luti Muktapur daw chem phi ya u mot u blai Ganesh ki hindu wa da tah ha uwi u moo siang wa heh.
Rap ha wah cha timun heipor wa hiar em ha pyrdi ki deiñ kwai em sa uwi u mot u Ganesh wa rap khian.
Ha tre dooh kani ka luti kjat daw poi phi ha ka Wah Amphubon heini daw chem phi ya sa uwi mot wa tah hei dur u hati nadooh i khlieh i doh wa ki kjat leh. Da ong wa ya uni u mot hati da tah na u moo wa heh wa em ha pyrdi kani ka wah. Chatre kani ka wah em ka yingkieñ moo wa da pra wa da tymoh ki deiñ.
Na kani ka wah u mih phi ha surok lai cha liang tidiang daw chem phi kawi la lad wa khian yow poi chei thaw sum u syiem wa tip kam ka Rupasor ka wa em kamwa 19.5 phut i jrong wei 15 phut i kmai.
Ha khlieh yong kani ka nan soom em u mot hati wa tah na u moo siang u wa kamjooh wa tah yow pynman ya kani ka thaw soom u syiem. Uni da booh ya oo heitæ i rukom yoo kamwa mih ka um ha kani ka nan na oo. Tangwa snaiwshih u yoo wa kani ka nan man ko kawa tngit wa ym em wa pait ya ka. Ha jan kani ka nan em sa artylli ki moo wa chna heidur ka sngi wa u bnai.
Katkam i parom warim ya kani ka nan da chna da u Luh Lyngskor Lamare katkam ka hukum u syiem.
Ha rood kani ka nan em kawi ka luti kjat wa lai cha ka yingkieñ moo kawa da rim bha wei wa da hap chiteiñ i bynta lai kjat yong ka.
Lada hiar phi na tre kani ka yingkieñ daw yoo phi hadooh katwoon i stad u warim u chna ya kani ka yingkieñ moo khlem pynemkaam nar.
Ya waroh kini ki thaw yoo kamwa ym em wa pait wa sumar yow pynsah ya ki. Heijooh i por ini i chah iehbeiñ em hi itea i sap wa pynyoo hadooh katwon rim ini waroh. Lait noh ha ka thaw sum u syeim wa da ker dei chram khyndaw bilat yoo kamwa da pynwiar yei warim yong ini i thaw.
Lada yoh lad phi, ka chnong Syndai toh i chong wa ym hoi u dam u yooh kjat na ki chnong wa em ha Ri-Loom Jaintia.
Lada lai won phi ha ki por lyiur daw chem phi ym duna ya soo tylli ki kchaid ha luti na Syndai cha Muktapur.
Discussion about this post