15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Ka Congress man ko kam ka BJP wow pynemkaam da ka niam yow yoh Vote: Conrad Sangma

0 Comments
Advertisement ad1
Advertisement ad1
Advertisement ad1
Advertisement ad1

Jowai: Ka yalang yalap Election ka NPP wa pynman ha madan Jrisaleiñ, Chutwakhu Jowai ynne ka sngi, da emlang leh u National President ka NPP u Conrad Sangma.

Hei klam yong oo da ong u wa kani ka Election MLA ymtoh kawa kam kiwi wa da dep, kani ka Election daw rai ko ya ka luti wow lai ka jylla wei ka Party NPP katwa dang lai ki sngi dang khlan ko wei ha Nagaland leh u krehlang ko wa ka NPF wei da pynyieñ ko 26 ngut ki kyrtong iwa pynyoo wa ki paidbah chaniah ki ha ka NPP wow wanrah ya i kylla hapoh ka jylla.

Da ong u wa ki paidbah da kot ki ka ka Congress wei ha i chnong Nangalbibra, South Garo Hills ka chnong wa em ki paar mooyong da chem u ya ki bru wa da e da ka poisa yong ki cha ka Congress yow yarap ha ka yalap Election tangwa manda poi ko ha ka bor wiar ko ngaiñ heipor wa emkaam yarap kiwa kyrchaan ya ka.

U Conrad da ong u wa u Dr. Mukul ym jooh em yachem u wa u Montri Rangbahdooh ka ri, u Montri ka Ministry of Coal wow thooh laad wow wai ya u mooyong wei ha kini ki 3 snem wa da chah khang u mooyong ymye tang u chna ya ka Policy wow tih ya uni mar pohkhyndaw tangwa da phah soi u ya ki paidbah waka MMDC yow tih ya u mooyong kawa ki paaid ka ri-loom Garo da ong ki toh ka Mukul Mining Dikkanchi Company.

Da ong u leh wa ka Congress ym em leh ko iyi iyi ki kaam wa bha wei ym em ko leh iyi iyi u ong kamtæ da sdang ko deiwa ong wa ka NPP waka BJP toh ka jooh.

Da pteiñ u deiwa ong wa ka Congress leh ym em phær ko na ka BJP kawa pynemkaam da ka niam yow paan Vote na ki bru wei da beiñ joor u ya ini.

Chooh chooh da ong u wa heipor wa chah kem ki 25 ngut ki father ha Madhya Pradesh ym em Congress wa wan wow yarap ya ki wei oo da lai yachem u wa u Home Minster ka ri u Rajnath Singh wow yaklam pyllait ya kini ki father.

Hei yatoh waka Jowai da kular u wow pyndep chna ya ka Iawmusiang Market Complex wei ym du ya ka te donhi kular u leh wow pynyoh yei waroh i thrangnood ki paidbah.

Ha kani ka sngi da pyllait paidbah u leh ya thong Election ka NPP kawa e pyrtuid ka People’s Document.

Da emlang leh ha kani ka sngi ki kyrtong MLA ka NPP na ri-loom Jaiñtia deilang wa u kyrtong ka NPP na Pynursla u Prestone Tynsong wa kiwi kiwi de.

Share this:
Previous

Khlaad u Dr. Pibiless Passah

Next

Da pynthymme yei dor i phniang charak ha WJH