Hadien wa ka Director General of Police ka Idashisha Nongrang da ong ko wym e laad ya ka HNLC wow pynyoo bor ko, neiliang u General Secretary ka HNLC, u Saiñkupar Nongtraw da e jubab u deiwa beiñ yeini wa da ong ka DGP deiwa ong wa ini pynyoo wa hadooh katwon em ki bru wa em i snaam Ynñiawtrep wa da jngai ki nei tre i thied ki wei yeiyi yachah ki. Man iwa sñiawsih wa man ki kam ki tanghæng neibynta kiwa na baar kiwa embor heithaw wow klam ko neibynta ki bru yong ka hi.
Ka HNLC da ong ko wa lada ka DGP klam ko yei rukom krehkaam ka ri tangwa kayi kattæ ka ri mut ko hawa ka Ri Ynñiawtrep ym jooh em pyndem ko ha ki bor kiwa na baar wei da synchaar ki pyn da ki ya ki hi chwa wow em ka India wei iwa ong ko wow kreh katkam ki aiñ ka ri pynoo ko yei rukom pyrkhat kiwa dang man mroo.
Da ong leh wa i em ka HNLC ymtoh wow pynyoo bor da ki kaam pynmynsoo tangwa yow pynskem yei em ka Ri Ynñiawtrep ym dei bor ka suloi næ ki aiñ yong kiwi. Wei i pynkhreh u yaklam yaskuk toh deiwa em i burom kylliang wei wow tipmit yei man kyrpang ka jaitbru dei wym toh u pyndem ha ka Indian Constitution kawa da pyndooh yei man i kam ka ri.
Kamtæ ki bru ka Ynñiawtrep hap ki wow husiar ya kitu kiwa baam na ka jooh ka miej wa em kiwa thombor, kiwa chong ha ka jooh ka miej wa kitu kiwa dai ya ka jaitbru wei kiwa baam na kti kiwa choon ya i heijooh i por kiwa yalap wow mylliñ yei tre i thied wei wow choon ya idæ. Wei kam kini ki bru ymtoh kitæ kiwa man ki khloor wa wanrah yei suk tangwa ki dalal kiwa thombor.
Ka HNLC da ong ko wa u yieñ skem ko wei ym em wa ye u pyntieñ ka wei wow pyrchah ya kitu kiwa kwah wow pyndooh yei pyrtuid, ka dustur riti, ki parom yongrim wei wow pynwiar yei em i kam ka ri.
Ka seiñ da ong ko wa u yieñ leh u yada yei hok wei laitlooid ka Ri Ynñiawtrep yow yoh yei tipmit wei wow yaleh pyrchah ya waroh ki bor kiwa kwah wow pyndooh yei hok wow synchaar i pyn da i ya i hi.
Discussion about this post