Jowai: Ka seiñkur Kongwang da yoh ko wow pynman ya ka Dorbar Pyllun ha uni u snem ha ka 20 tarik uni u bnai ha ka chnong Kongwang.
Kani ka Dorbar toh kawa jooh pynman man ka ar snem. Ha kani ka sngi, da pyllai ya ka Dorbar da u President ka seiñ Kongwang u Daniel Kongwang uwa da e leh ya i ktien kyrkhu kyrdoh ya ka seiñkur wei da e khublei u leh cha waroh ki parakur kiwa poi cha kani ka Dorbar.
U President da ban joor u leh yei emkaam wow pynkhlan yei man ya tylli lang yong kur.
Da sdang ya ka dorbar deiwa pynhær lama ka seiñkur da u Chief Advisor ka seiñ u Robinson Kongwang hapyrdi i sakhi ki paidbah ka kur wei da batai leh yei yumut ka lama kawa pynyoo yei yatylli ka kur wa kynthup wa ki San kpoh.
Ha kani ka sngi, da pynkup burom wei da saam khusnaam cha ki khynroo khyllood ka kur kiwa wan chakhmat ha ki yakhun exam ha ki laiñ waphær waphær neibynta u snem 2014-15, 2015-16.
Ya kani ka saam khusnaam da pyllai da ka Award Committee ka seiñkur hapoh i yahkhmat u Anthony Kongwang kam u chairman wa u Mathewstar Kongwang kam u Secretary.
Kiwa yoh rah ya kani ka burom da em ki 6 ngut wa kynthup ya:
Umsyiem Unit- U Rishotshkem (Dip. Civil Engineering 72%), Ka Jessica (GNM Nursing 63%), ka Onima (MA Khasi 62%), u Iohborlang (SSLC 78%).
Kongwang Unit- Ka Youphida (MA Linguistic 67%) wa u Felixbhabok (SSLC 78%).
Kini ki 6 ngut leh da yoh ki waka song poisa kamjooh ki Memento.
U Sordar ka Mukertila u Phren Kongwang hawa klam u kam u kongsan da e yaroh ya kini kiwa da wanrah burom ya ka kur wei da kyntu u leh ya kiwi wow bood dien ki ya kini ki 6 ngut yow wanrah burom ym du yong samen samen kamjooh leh ya ka jaitbru waroh kawi.
U Chief Adviser ka seiñkur u Robinson Kongwang wa u Advisor ka seiñkur u Bowelson Kongwang, da e ki ya ki kyntien snieñ kyntien kroo, wei da ban joor wa kam ki khynroo khyllood toh u em ki ka thong wa e mynsien yakhun wei wow yait na ki kaam sih kam i dih kiad, sikret, biri wa ki drugs.
U Mathewstar Kongwang da e u ya ki ktien e khublei cha waroh kiwa embynta ha kani ka yalang saam khusnam.
Ha kani ka Dorbar da pynskhem leh ya kiwa kitkaam thymme ka seiñkur Kongwang Pyllun neibynta ki ar snem 2017-19. Kiwa kitkam wa da chah jied toh:
President-Daniel kongwang, Vice President-u Bowelson Kongwang wa u Beneson Kongwang, Gen. Secretary-u William Kongwang, Asst. General Secretary-u Amstrong Kongwang, Treasurer-u Allando Kongwang, Publicity Secretary-u Reachingson Kongwang, Statistic Secretary-u Sanjeev Kongwang wa 8 ngut ki member kiwa kynthup ya u Liwell kongwang, u Jupita Kongwang, u Fortis Kongwang, u Silvenus Kongwang, u Rosibell Kongwang, u Nicholos Kongwang, u Honell Kongwang, ka Pdianghun Kongwang deilang ki president wa ki secretary wa uwi u dkhot na waroh ki unit kiwa da man chwa ki dkhot ka Executive Committee ka seiñbei.
Ya kani ka khubor da pyllait da u Reachingson Kongwang, Publicity Secretary Sengkur Kongwang Pyllun.
Discussion about this post