15 49.0138 8.38624 1 0 4000 1 https://wyrta.com 300 0

Ka dorbar wa nyngkong ka kur Dkhar Jaiñtia Hills ha Raliang

0 Comments
Advertisement ad1

Jowai: Ka kur Dkhar Jaiñtia Hills ynne ka sngi da pynman ko yaka dorbar næ ka yachemlang wa nyngkong yong ka ha chnong Raliang heiwa ki khon ka kur naki Unit waphær waphær nadooh na jan na jngai da wan emlang ki ha kani ka sngi yow yoh i ya tipmit para kur kamjooh i sneiñ i kroo naki waheh wasian ka kur kiwa da rap em i tip i chemphang.

Ha kani ka sngi ki waheh ka kur wa em haki kyrdan waphær waphær da ya emlang ki wa kynthup ya u Taining Dkhar Retd. IAS Officer, u Lakhon Dkhar, Phasmon Dkhar, Habahun Dkhar kiwa man ki MDC ka JHADC, ka Dr. Iaraplang Dkhar wa kiwi kiwi haka yalang wa pynlai da u Harwis C Dkhar, President Seiñ Kur.

Advertisement ad1

U kongsan u Taining Dkhar hawa pynche yei tynre ka kur Dkhar, khana u wa neiliang yong ki cha ka thaaiñ Khasi leh da lai ki chakhmat heiyatoh wow thooh bniah yei yatoh kur wa kiwi ki kur. Khut haroh u i yakrehlang yong ki kur nadooh ki Unit waphær waphær yow yoh i yatylli lang chikur ha Khasi wa Jaiñtia.

Yooluti u wa kani ka yachemlang u wanrah ko i khyrngiat yongbru wei wow yoo ka pyrthai yei yatylli.

“Ka chongkha chongman toh kawa kyntang, wei ka chongkha hi wa khlem i tipkur tipkha man ka chongkha wa pathar. Heiwon iwon, i burom wa khroo tam yong u chynrang næ ka kynthai chong hei ye wow ri wei burom yei man rynyeiñ khnang yow lait nei chongkha kulmar”, ong u Pastor Samkhih Dkhar hawa e yei klam hajrong ka phang “Ka chongkha chongman wa ki jait dih pynmuaid”.

Da ong haroh u katwa nangkylla ka juk da em kiwa chongkha khlem sñiawthooh næ tip yei sdang i kut. Wei i dih pynmuaid wa boonjait leh man kawa ktah yaka yung ka sem ka imlang sahlang.

Kamtæ yow yoh yei sñiawsuk, i roi i paar ka kur, u yoh yei naam i burom ka yung toh ka skur wa nyngkong wow sikai yaki khon ki kti heiyatoh i akor salon. 

Neiliang u Father Felix Dkhar hawa klam hajrong i kamram ki khynroo, da ong u wa i por khynroo toh i rta wa man pyrdi hei im bru, wei kamwa da jooh tip, ki khynroo man ki ka mynried mankawi, da kyntu u yaki wow pyrkhat ki yi wow leh neibynta ka kur wym wow yooluti waka kur u leh ko neibynta yong ki.

Seiwi leh iwa kongsan toh ka akor burom ha yung ha sem, u man kiwa pynkhian hakhmat ki waheh, u pait jngai yaka mynried, wei chwa wow chim yaka kyrdan manbei manpa leh toh u man kiwa da pynkhreh.

Kiwi won wa klam kynthup ya u Lakhon Dkhar uwa da klam heiyatoh waka imlang sahlang deiwa ong, wym hoi wa i sñiaw phær ñiam næ i sñiaw phær Party wa wanrah ko i ya piah ya pra chikur, tangwa haka kur u em iwi don i sñiaw yow ye u pynkhlan yaka seiñ kur.

Ka Dr. Iaraplang Dkhar da klam ko hajrong i kamram ki manbei wa i puræ puthi, u Phasmon Dkhar heiyatoh waka kur Dkhar, u Habahun Dkhar heiyatoh ka synchaar khadar wa katni wei nachwa, neitæ i klam na u Medrikson Dkhar, President wa nyngkong ka kur wa na u Rangdamon Dkhar wa kiwi.

Neitæ won da yoh ka Report kyllum ka kur na u Hamjhan H Dkhar, General Secretary Seiñ Kur Central body, wei da pyllait paidbah leh yaka Calender ka kur. 

Da pynchongchit chooh chooh ya kani ka sngi da ki chaad ki rwai naki Unit kur waphær waphær.

Advertisement ad1

0 Comments

Leave a Reply