Jowai : Ynnin ka 12 tarik ye ko u man ka sngi wow sah kynmoo ha ki khon ka Niamtre yong ka Raij Jowai heiwa da pynman ya ka Dorbar wa nyngkong yong ki Kñi ha Yung Langdoh, Loomiongkjam heiwa da ki spah ngut da wan chimbynta ki ha ka.
Ya kani ka dorbar da pynman da ka Dorbar Niam wei da pynman ya ka hajrong ka nongrim wow pynskem ya ka yurim ki ma ki woh ki warim wajah yow embynta ha ka niam ka rukom ha yung ha sem wa ki kaam niam yonglang yongbi.
Ya ka dorbar da pyllai da u Pator ka Elaka Jowai u Raymond Nartiang, da yoh ya ki kyntien pdiang burom na u Langdoh ka Raij Jowai u ma Samboon Siangbood.
U President ka Seiñraij Jowai, u ma OR Challam da e u ki kyntien hajrong ka phang “Ka thong wei kaam ka Seiñraij Jowai” da yoh leh yei klam Lam Khmat na u Dolloi ka Elaka Jowai u ma Puramon Kynjing.
Ha kani ka dorbar da yatai sani hajrong ka iktiar wei kaamram man ki Kñi yeiwa da pynbood won yei klam na u ma Pearlet Toi uwa da klam hajrong ka phang “I dor wa i man i kun main Kñi”.
Da yatai leh hajrong ka phang “I eh i wit wa ya takhooh.” Ki Kñi ha kani ka dorbar da yatai ki hajrong kiwa boon ki phang wei da pachat yumut ki hei yatoh wa ki kaam niam ha yung wa ha lait.
Em leh ki Kñi kiwa da kyntu ya ka Dorbar Niam yow e yarap ko kti timun tidiang la heiwon iwon i por wa emkaam ya ka wei da kynytu leh wow e i sikai i pynyoo wa i yah luti ya ki Kñi heiyatoh wa ki kaam niam.
U dolloi ka Elaka Jowai hei klam yong oo da ong u “lynga kani ka Dorbar Niam u pyrchang u wanrah i yatylli wei ymtoh u piah u pra ka manyung mansem”.
Da ong u leh wa waroh i du ki wym biang katwa kamtæ emkaam u pyndap i ya iwa duna wei wow pynyoo yeiwa toh lada em i duna næ i bakla.
Chwa u kut ka Dorbar da yoh ya ki kyntien makhane na u, Kñi ka Seiñraij Jowai u ma Lamwan Paswet. Ha kani ka Dorbar da wan chim bynta palat 300 ngut ki Kñi na ka Raij Jowai.
Discussion about this post