Ka National People’s Party (NPP) da pdiang wei da pynskem noh ko ya ka NPP Block yong ka East Shillong Constituency, heiwa da wan psiah leh u Malcolm Tariang ha ka yalang wa man ha pchem ka yung krehkaam ka Party.
U Malcolm Tariang toh uwa sikai (Professor) wei uwi na kiwa yahkhmat ka saiñpyrthai na ki seiñ ri-loom, uwa da yakhun leh ya ka Election MLA ha ki snem wa dadep heiwa da psiah u cha ka NPP ynne ka sngi, wei da pdiang ya oo da u National President, u Conrad Sangma, u National Vice President, u Prestone Tynsong wa kiwi ki heh ka NPP.
Hawa klam ha ka yalang, u Malcolm da ong u wa da man u kam u dkhot thymme ha ka Party, wei da sñiawngooh u ya ka NPP Block yong ka East Shillong kiwa da pdiang ya oo, khamtam ya ka Dr. M Ampareen Lyngdoh kawa man ka MLA wa katni na ka Constituency, hanla ympu man ko kam ka dkhot ka NPP hadooh katni, tangwa ha ki kajiak por wow wan daw emlang noh ko ha ka NPP.
