15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Ka esikai wa chaphang ki aiñ ya ki dkhot ka CSC ynne ka sngi yow hikai ki ya kiwi

0 Comments

Jowai : Ka yungkrehkaam ka CSC e-Governance Services West Jaiñtia Hills District, Meghalaya ynne ka 27 tarik da pynman ko yei pynche cha ki dkhot ka Common Service Centre (CSC) yong ki chnong waphær waphær hajrong ki katu katni tylli ki hok yong ki wa chong hapoh ka Ri India kamjooh ki aiñ wow yoh yada ha Conference Hall, DC Office, Jowai.

Ya kani ka esikai da tip kam ka Legal Literacy Programme kawi na ka rukom krehkaam yong ka CSC e-Governance Services India Limited chirup wa ka Department of Law, Ministry of Law and Justice yong ka sorkar India.

Advertisement ad1

U Biangpor Shylla ong u ka CSC-SPV daw pynman ko yaka legal awareness  programme ha palat 9000 tylli ki CSCs hapoh Northeast, i thmu yong ka toh wow rap pynku chooh chooh i tip i chemphang ki bru cha ki thaiñ nongkyndong hei yatoh wa ki hok yong ki wa chong chnong kamjooh ki aiñ ki kanun.

Ha kani ka sngi neiliang ki District Manager wa kynthup ya u Marda oo Myrchiang, u Biangpor Shylla da batai ki chaki CSC yong ki chnong waphær waphær wa haap hapoh West wa ka East Jaiñtia Hills District hei yatoh wa ki hok yong ki wa chong chnong wei kammon u yoh ya ki, khnang wa kiwon kiwon leh manda poi ki cha ki chnong ki thaw kong ki u  pynche kylla won da ki cha ki paaid wa chong chnong.

Hapoh kani ka Legal Literacy Campaign da batai chaphang ya ka hok yong ki kynthai khynnah wow yoh i bichaar nadooh i chah thombor ha yung ha sem, ki chah dat, chah klam beiñ. I hok wow yoh i stat i tip, i hok wow yoh i baam wa biang, i hok wow yada ya ki Scheduled Tribe / Schedule Caste katkam ka Act 1988, i hok wow yoh yutip katkam ka Act 2005 wa kiwi kiwi.

Da batai leh wa hawa chem yeiwon iwon i chah lehbeiñ ymtoh u kun du ha samen neidaw wa man ka bru næ u bru wa dooh ym sñiaw yohlaad u lai cha ka aiñ toh u tip u kynmoo wa em hi ka laad yarap wow pynyasaid aiñ mynkna kawa tip kam ka Legal Services Authorities Act 1987 dei wow lai yachem chaki District Legal Services Authorities næ Service Provider kiwa da register waka sorkar neibynta u yarap kyrpang ya kam ini i jia.

Kani ka Legal Literacy Campaign da klam ko leh wa katkam ka riti synchaar wada e da ka Constitution yong ka ri India waroh kiwa chong chnong u yoh ki yei hok samen (Fundamental Right) hapoh ka imlang sahlang yow yarap u e mynsien iwi ya iwi khlem i sniaw yapher niam, sñiaw yaphær kyrdan, kamtæ ter ter.

U Deputy Commissioner ka West Jaiñtia u R.Rapthap hei klam yong o da ong u, kani toh kawi ka laad wow e myntoi ya ki paidbah neibhah boon kiwa ngat hei chah thombor tangwa neidaw wym tip ya ki laad ki luti dooh noh ki yei hok yong ki.

Heijooh i por pynsniaw u leh i sñiawkhia hajrong wa joor i chah thombor ki kynthai khynnah ha kini ki sngi, wei yooluti u lyngba kani ka laad ka luti u pynsñiawthooh chooh chooh ya ki paidbah u ye ki wow wanrah i chongsuk chongsaiñ haka imlang sahlang.

Previous
Next

0 Comments

Leave a Reply