Jowai: Ki dkhot ka National Service Scheme (NSS) na ki 5 tylli ki College na East wa West Jaiñtia Hills wa kynthup ya ka Kiang Nangbah Government College, Thomas Jones Synod College, Jaiñtia Eastern College, Nongtalang College wa ka Shangpung College ynne ka sngi da yachem lang ki ha Thomas Jones Synod College kam chibynta ka esikai wa tip kam ka “Life Skills, Personality Development, Leadership & Career Guidance.”
Na kini ki College da wan mar 10 ngut ki wow sah dei sah ha Thomas Jones Synod College ha kini ki 5 sngi wei daw yabhah ya kani ka esikai 2 sngi ha KNGC wa 2 sngi ha Thomas Jones Synod College.
Kam chibynta wow wai ya kani ka esikai ya ki NSS Volunteers da wan u DM Wallang, ADC West Jaiñtia Hills hei emlang u Dr. L. Kma, Programme Co-ordinator, NSS Cell NEHU, u Principal ka Thomas Jones College wa u Principal ka Shangpung College.
U Dr. Kma da ong u wa emkaam wow pynman ya kam kani ka esikai neibhah katni boon kiwa da pyndep ya ki puræ puthi hadooh kiwa poi dooh cha khmat leh ym yoh ki ya i kaam wa kwah ki, ini toh neidaw wa ym em ki ki kitæ ki sap ha ki kiwa thung kreh kwah ki. Lada em du i stat tangwa ym tip u yaklam wa ki bru ha ki kaam wa kreh, man i wym poi thong neibhah boon ki por hi ha ki kaam ki jam hap tip u pynyatoh wa ki bru.
Kamtæ da yooluti u wa ha kini ki khajiak sngi daw yohmyntoi kiwa chimbynta chiboon wow pynkhreh ya ka mynried yong ki neibhah ini i rta wa katni toh iwa emkaam bha.
U DM Wallang hei klam yong oo da ong u wa i em i jar jiar ki sap wa em ha i, iwi toh iwa em ha i nadooh wa kha katwa ya kiwi ye u yoh ki deiwa em wa sikai ya i. Da pynkynmoo u leh wa kiwa poi hi cha kliar u loom wa yoo ka pyrthai waroh kawi toh ki bru wa da pynwandur yei long i man ki da ki moochynthut wa boon jait wa tyngkhooh ki tangwa kattæ leh ym ran dien ki.
Discussion about this post