15 49.0138 8.38624 1 0 4000 1 https://wyrta.com 300 0
Advertisement ad1

Ka esikai ya ki seiñ kynthai yow yarap ya kiwa ha yung kiwa dooh yei mynsien ha i bor ka rymaw

0 Comments
Advertisement ad1

Jowai: Ka Meghalaya Administrative Training Institude (MATI) Shillong, chirup i ya krehlang wa ka District Disaster Management Authority (DDMA), Jowai ha kani ka 20 tarik u Khonchonglad da pynman ki ya ka e sikai kyrpang ya ki seiñ kynthai hajrong ka phang “Psycho Social Care” lane wow yarap pynyoh i thij i pyrkhat wa chait wa khiah ya kitu ki bru wa ya tyngkhooh hei bor pynjæd pynpra ka bei rymaw deiwa dooh noh ki ya kiwa ha yung ha sem kiwa maya saya wa kiwi.

I thmu wa kongsan lyngba kam kani ka e sikai toh yow pynsniawthiooh hei yatoh wa kammon u e yarap ya ki khynnah kynthai ki manbei haka imlang sahlang kiwa chah ktah i bor pyrkhat hadien wa dooh noh ki ya kiwa ha yung ha sem kiwa maya saya yong ki nei ya tyngkhooh wa ki bor pynjæd pynpra ka rymaw, khnang yow lait ki nei pyrkhat kutlaad deiwa e haki i buit i bor wa khlan yow ye ki u im deilang i chait hei bor pyrkhat.

Heini i esikai da ioh i batai bniah naka M. Langstieh Asst. Professor, Disaster Management Cell, MATI Shillong, ka I. Warjri Asst. Director, Good Governance Cell, MATI heiwa da wan ya chim bynta da ki seiñ kynthai naki Balang waphær waphær, ki seiñ kynthai waphær waphær chirup i emlang u DDMA u E. Langchiang wa kiwi ha DC Conference Hall.

Neiliang ka M. Langstieh Asst. Professor, Disaster Management Cell, MATI Shillong hawa e ko yei klam ong ko boonsien hawa jia i bor pynjæd ka rymaw ki bru wa chah ktah deiwa dooh yei mynsien kiwa maya, i sniawsih haki neh sah i lynter, ym yoh thiah de ki dei toh rukom natlor i pyrkhat boonjait wa kiwi kiwi. Kamtæ emkaam wow jan cha ki u e mynsien ya ki yow lait ki na kini waroh.

Da ong haroh ko i bor pynjæd pynpra ym em pynyaphær ko wei ktah ko ya waroh nadooh uwa dooh hadooh uwa mahajon, wei boonsien ym ye hi leh u bichaar wa hadooh katwon ktah i sngawsih, i sniawkthang wa em hapoh u bru, neitæ i daw ymhoi u klam næ chim ya ka rai yeiwa yoo hi eh nei rukom man u bru najrong.

Ka I. Warjri Asst Director, Good Governance Cell, MATI da batai ko yei rukom wow e yarap katkam i rta kynthup leh nadooh i rukom im i rukom bam wa kiwi, katwa u P. Deb, District Coordinator, Indian Red Cross Society Shillong won da batai u wa kammon u pynyatoh næ yajan wa ki khynnah.

Chwa kani ka sngi won haka 19 tarik da em haroh ka e sikai nei wynta kiwa kreh hapoh DC ophis jowai hei yatoh wa kammon u man kiwa pynkhreh chwa u jia i khih khmi wei hadien wada dep jia.

Advertisement ad1

0 Comments

Leave a Reply