U Montri Rangbah ka jylla, u Conrad Kongal Sangma da kyntait u warr yei pynbaad yong ka Bharatiya Janata Party (BJP) Meghalaya, wa ka T. 1500 klur toh ka ram wa da e cha ki paidbah mar T. 5000 lyngba ka FOCUS.
Hawa jubab yei pynbaad yong ka BJP, da ong u wa ym tip uyi wa pynmih ya ini i pynbaad, tangwa u bru wa pynbaad toh u wym tip yei krehkaam ka sorkar, wei da khana u leh wa ini i e ym toh ka ram tangwa ka yarap poisa wei ym toh i pynlut kawa hadooh T. 1500 klur, neibhah ya ka FOCUS wa FOCUS Plus da pynlut kamwa T. 450 klur neibynta 4 lak chiteiñ ki manyung.
Hawa yatoh wa i yoh ya ka poisa, u Montri Rangbah da ong u wa em ki laad wa ka sorkar da pynyoh ya ka poisa wa kynthup lyngba ki dan, ki mang poisa na ki ram wa ka sorkar da chim ko wa kiwi ki kreh namo ki Project wa yoh yarap na baar.
Hajrong i pynbaad wa i wanrah ya ka FOCUS toh i leh Politics, u Conrad da ong u wa man iwa sñiawsih wow ong wa lada yarap ya ki manyung kiwa emkaam, khamtam ki warep wa kani toh ka buit Election, wei pynrap biang u wa uwon uwon u bru wa pynbaad ym sñiawthooh wa kini toh ki warep wa emkaam yei yarap.
Da khana u wa ini ym toh i leh Politics wa da jan ka Election neibhah ya kani da sdang nadooh chisnem chiteiñ na Tura wei ym yahaap wow pynwan lang ha ka Election.
U Conrad da khana u wa kani ka Scheme toh kawa da mut wow leh man-u-snem wei daw lut T. 450 klur neibynta ki 4 lak chiteiñ ki manyung, wei toh ka yarap poisa wa da e cha ki seiñ ki warep yow leh ki ya iyi iyi, wei da khana u wa kiwa boon da chim ki wow thied ya ki symbe wa ki mrad yow ri.
