I pyrtuid ka Fully Niang toh iwa da sñiaw bha ym du hapoh ka R-loom Jaiñtia tangwa wot ka jylla leh waroh kawi khamtam hadien wa yoh ko ya ka State Award for Handicraft Artisans ha ka 25 u Naisaphra 2020.
Ka Fully Niang toh kawa 42 snem i rta na chnong Shangpung kawa em san ngut ki khon wei da man ko kawa thaiñ ya ki tiar wa ha rukom kam ki kriah booh soh, ki khri-pathri, ki kpieñ wa kiwi kiwi kattku la kamwa 15 snem khlem sangeh.
Neiliang yong ka da jooh chah hikai ko ha i thaiñ tiar kam ha ka District Commerce & Industries Centre West Jaiñtia Hills District, ka IIT Guwahati wa kiwi kiwi wei da jooh lai mihkhmat ko ya ka jylla ha ki yaw pynyoo rong (Exhibition) ya ki tiar thaiñ ha kiwi ki jylla.
Ka Fully da ong ko wa katni da im ko na ini i kaam weiwa ymye u ong ha ka chi bnai katwon yoh ko tangwa ha ka chi snem jooh yoh ko kamwa T. 2 Lak tam na ki Exhibition wei wow dai ya kini ki tiar wa thaiñ ko.
Hajrong ki mar wa pynemkaam ko wow thaiñ ya kini ki tiar, ka Fully da ong ko wa katni i dor u ramet da man i iwa syad weiwa kamwa man wa lai hi i por i dor ki mar leh dang ku i.
Chooh chooh da pyntip ko wa nadooh wa jied ya ka chnong Shangpung kam ka Model Village da jied ya ka wow esikai ko ya ki khynnah kynthai ka chnong wow thaiñ tiar wei hadooh katni da esikai ko hadooh 25 ngut heiwa ha ka chi snem da esikai ko 5 ngut ki khynnah.
Ini i esikai ka Fully ya ki khynnah man i mynkna wei kyrmen ko leh wa hadien wa dep esikai ya ki, ki leh wow tip ki wow pynemkaam yeini i stat wa yoh ki khnang wa ki leh u ye ki wow im na ini i kaam.
Hawa yaklam wa u Waheh Chnong ka Shangpung Pohchnong, u Marki Rabon da ong u wa neiliang ka chnong yaroh ko ya ka (Fully) wei ym em mutdur ki wow wanrah ko yei naam wei da man ko leh kawa hakhmat dooh hei wow esikai ya ki khynnah hapoh ka chnong.
