Ka Halari LP & UP School ka skur wa nyngkong ha Nangbah wa ye u e ya ka MS Office Certificate Course

Ynne ka sngi, ka Halari L.P. & U.P. School Nangbah da yoh ko wow saam ya ki MS Office Certificate Course cha ki khynnah skur kiwa da pyndep ya kani ka Short Term Course ha kani hi ka skur ha ka yalang pynkup burom wa tip kam ka Moving Up cum Felicitation Day.

Ha kani ka yalang da wan sakhilang wa ka SDSEO ka West Jaiñtia Hills, ka A.P. Syiem kam ka kongsan, ka C. Lyngdoh, BMC Thadlaskein Block kam ka symbood kongsan deiwa emlang u Director ka JIT Jowai, u B. Marweiñ wa u Dolloi ka Elaka Nangbah, u M. Garod deilang wa ki bei ki pa yong ki khynnah skur.

Ya kani ka yalang lehkmen da yahhmat da ka L. Dkhar, Asst. Teacher wa da pymman ha pchem kani ka skur heiwa neiliang ka kongsan hawa e yei klam da e ko i yaroh ya kani ka skur wa ye ko u wanrah ya kani ka Course. Da ban joor ko leh ya ka SMC wa ya kiwa sikai wow yaleh katwa ye wa lah u wanrah ya kiwi tawon ki yoh myntoi ha kani ka skur.

Da ong haroh ko ya kiwa sikai wow chimkhia ki yei kaam yong ki neibhah kiwa sikai toh kiwa seiñdur ya ka mynried ki khynnah.

Related posts

Ku ka Pass Percentage ka SSLC 2025 cha ka 96.02% hadien wa pynbna ya ka Result ka Supplementary Exam

May 26, 2025

Daw pynlait ya ki Form Class XI (Commerce) ka Government Boys’ HSS, Jowai

May 5, 2025

Da yoh leh yei klam na ka symbood kongsan kawa dap dei kmen wei da pynsñiaw ko wa kani ka skur man ko kawa nyngkong dooh wow wanrah ya kani ka Short Term Course ha waroh ka West Jaiñtia Hills.

Neiliang u Dolloi da ong u ya kiwa sikai wow e lut ki yei buit i budia wa em ha ki cha ki khynnah waroh.

U Director yong ka Jaintia Institute of Technology (JIT) da kyrpaad u ya ka SMC wow ya krehlang chirup yow ye u wanrah chooh chooh ya kiwi tawon ki Short Term Course ha kani ka skur.

Neiliang ka skur da e khublei ko leh ya kiwa sikai Computer yong ka skur kiwa da ye u hikai ya ki khynnah wow pyndep ki ya ka Exam hadooh wa ye u Pass ya kani ka MS Office Course wei da yoh ki ya ki Certificate lyngba ka Jaintia Institute of Technology (JIT) Jowai.

Khaddooh da yoh yei klam e khublei na u Principal yong ka skur, u H. Thubru uwa da pynsñiaw yei sñiawngooh kyrpang nadooh ka SDSEO, ka BMC, Director JIT, u Dolloi ka Elaka Nangbah wa ki bei ki pa yong ki khynnah skur wa da pynlait ki yei por wa kordor yong ki wow emlang ha kani ka sngi wa kyrpang yong ka skur. Da e khublei u leh ya kiwa sikai kiwa da chah chitom neibynta i bha yong ki khynnah skur wa ka skur hi waroh kawi.

Neiliang ka skur da khublei kyrpang ko leh ya u Shanbor Lyngdoh wa lyngba yong oo da thooh u ya ki laad ki luti hadooh wa da ye u wanrah ya ka  Computer Course ha kani ka skur dei ya krehlang wa ka JIT Jowai lyngba u Director yong ka.