Jowai: U Deputy Commissioner u wa man leh kam u Chairman ka District Health Society ka West Jaintia Hills District da pyntip biang u wa u pyman ia ka District Health Adalat ha Jowai Hospital, haka 25 tarik uni u bnai, nadooh i por 11 waje i step.
Kani ka Health Adalat toh kawa da booh tarik chwa ia ka ha ka 17 tarik wa da dep tangwa da kynriah cha kani ka 25 tarik.
U DC da khana u waroh i ood wa ki jingeh ki paidbah kiwa dang sah u pyndep wa ki Sub-Centers, Primary Health Centres (PHCs), Community Health Centres (CHCs) wa kumjuh leh ha iatoh wa ka Jowai Civil Hospital ye ki paidbah u wan rah ha katai ka “Health Adalat”. Ki paidbah leh ye ki e u e jingmut yow pynbha pynmiat ia ka District Hospital, i rukom krehkaam ki Health Centers wa kiwi kiwa iatoh wa i cheit i khiah.
Da ong u DC waroh ki skim kiwa pynkreh na ka wynta ka koit ka khiah lyngba ka sorkar jylla waka sorkar pyrdi kam ka National Rural Mission (NRHM), Megha Health Insurance Scheme (MHIS), National Vector Borne Disease Control Programme (NVBDCP), National Leprosy Eradication Programme (NLEP), National Aids Control Programme (NACP), National Mental Health Programme (NMHP) wa kiwei de ki skim, daw peit kham bniah ha katai ka Health Adalat.
U Deputy Commissioner da kyrpad u ia waroh ki Seiñbhalang (NGOs), Civil Society Organisations, ki paidbah wa kiwei de u sniawbha ki u wan khnang cha katai ka “Health Adalat” ioh u em i snaiwthoohlang wa ki nongkreh ka distrik wa ki paidbah.
Discussion about this post