Ka India da man ko kam ka ri wa boon dooh i baam tyngka kawa da yoh yaka Bribery Rate wa 39% hapoh Asia katkam wa chem i sorjamin (Survey) ka Transparency International heiwa kiwa boon ki bru da pynemkaam ki leh yei ya tipmit bru ki yow yoh ki yeiwa emkaam kiwa toh u yoh naka sorkar.
Ka Transparency International nalor wa chem ko wa 39% ki bru da hap ki wow pynbaam tyngka, 46% ki bru da pynemkaam ki deiwa tipmit yaki bru wa em hei bor yow yoh ki yeiwa emkaam ki iwa man dadooh 17 tarik u Naiynru hadooh ka 17 tarik u Naiynñiaw uni u snem deiwa yaklam wa 2,000 ngut ki bru.
Hadien ka India da wan ka Cambodia hei wa ar kawa yoh 37%, pynbood saka Indonesia kawa yoh 30% katwa ka Maldives waka Japan da yoh ki ya iwa duna dooh ki Bribery Rate wa 2% iwa pynbood saka South Korea (10%) waka Nepal (12%).
Haka Report ka Transparency International da ong wa i hap pynbaam tyngka haki kaam sorkar dang pteiñ i wow man kjut hapoh India. I slem wow pyndep yei kaam sorkar, ki kaam wa boonjait wa hap u leh wei wym biang i rukom krehkaam da pynbor ko yaki bru paidbah wow thooh laad ki kammon wow yoh yeiwa emkaam ki iwa wanrah yow yachem wa ki bru wa em hei bor wei deiwa pynbaam tyngka.
Da chem leh kiwa boon kiwa chong chnong kiwa em kamwa 63% ki tieñ ki wow ujor pyrchah yei kaam baam-tooh neidaw wa daw ye ki u chah pynchitom kylla.
89% ki bru da ong ki wa i kaam baam-tooh toh iwa eh bha i kaam heiwa uwi na ki 5 ngut da ong ki yow yoh yaki myntoi naka sorkar nadooh ka sumaar sukhær, i puræ puthi iwa da hap bait wow pynbaam tyngka ha u snem wa da dep.
Chooh chooh da chem wa ha India, 42% toh kiwa hap pynbaam tyngka yaki pulit yow yoh yaki kot ki sla wa 38% da su ki heiyatoh waki kaam bichaar.
