Hadien wa mih boon ki pynbaad pyrchah yaka sorkar MDA da ka Congress kawa em leh hei liang pyrchah ka yung dorbar chna aiñ wa yahkhmat da u Dr. Mukul Sangma yaka sorka MDA, ynne ka sngi neiliang ka Party NPP da e ko yei jubab du hadien kattu katni kynta wa u Montri Rangbah da pynche u yeiwa pynbaad u Dr. Mukul Sangma.
Hawa yaklam wa ki laad pathai khubor, uwa e ktien ka NPP uwa man leh kam u MLA ka Williamnagar u Marcuise M Marak da ong u wa u Dr. Mukul da sai u ya kut sker ki kaam neidaw wa tieñ u ya wiar ya mylliñ ki bru ka ka Congress.
U Marak da ong u wa u Mukul heipor wa man u kam u Montri Rangbah ym ye u wow pynhiar chuki ya u Montri ki kaam pohyung u HDR Lyngdoh hadien wa mih khubor waka Guest yong u Lyngdoh ka Marvelene’s Inn da pynemkaam yaka yow dai kynthai hadooh ki kynthai wa dang khian rta heiwa u Mukul da pynksan u yei wym leh u neidaw waka aiñ ym em dawa ko wow phah hiar chuki, kamtæ da ong u Marak wa kini toh ki ktien yong u bru uwa ngait hei pynkrehkaam yaka aiñ.
Heiyatoh won wa i pynbaad yei rukom pynkrehkaam yaka Saubhagya Scheme ka sorkar pyrdi yow pynyoh bordiñ, u Marak da ong u wa u Mukul sihlet u wa oo ym ye u wow leh ya iwa ye ka sorkar MDA wow leh hadooh kattæ heiwa yaka Tender, i e kreh da leh katkam ki kyndon wei da yoo wyrwai wa hap u Montri Rangbah wow sikai ya uwa yahkhmat ka liang pyrchah kammon krehkaam ki Scheme ka sorkar pyrdi wei kiwi ki pynbaad u toh kiwa da chem chwa u iwa jia heipor yong oo.
“Ini hi waroh toh wa tieñ u wa ka Congress daw mylliñ noh ki paidbah yaka, daw sah sa du i parom donhi katwa dang lai i por wei deiwa em uwa yahkhmat kam u Mukul ym slem de da jia i,” da ong u Marak.
