Ka Ministry of Home Affairs da pynbna ko wow pynkup burom ya ka Prof. Badaplin War, heiwa da jied wow man ko kam kawi wow yoh ya kawi na ki khusnam wa heh yong ka ri India, ka Padma Shri Award na u President ka ri.
Hawa yaklam wa ka Professor kawa man leh ka Treasurer yong ka Khasi Author’s Society, da pynsñiaw ko yei kmen hajrong ini i tipmit neibynta iwa da noh, da e ko cha ka thoh ka tar wei da pyntip ko yei lai luti hadooh wa katni da poi cha kani ka kyrdan wow yoh yei tipmit deiwa pynkup burom da u President ka ri India.
Ka Prof. Badaplin War da ong ko wa ka KAS ym em mylliñ ko wow pynmih yei thoh wow kyntu ya ka ktien Khasi neibynta wow pynpsiah hapoh ka Eight Schedule, deiwa pynmih ya ka ‘Thiar ki Nongthoh’ wa ‘Ka Syngkhong Jingtip’.
Da pyntip ko wa ka KAS da yoh yarap poisa na ka sorkar jylla wei da sdang wow lum lut ya ki kyntien waroh wow pynmih ha kawi ka Dictionary wa yaar kawa khut da “Ka Khasi-Khasi” Dictionary, kawa e lang leh ya ki kyntien ‘English’ wei heijooh i por daw booh ya ka ‘Phonetic Transcription’, yow ye kiwi wow kynnoh ha i rukom wa toh ya ki kyntien Khasi.
Ka Prof. War kawa man leh ka Supervisor neibynta wow pynmih ya kani ka Dictionary da pynsñiaw ko yei kyrmen wow ye u pyndep noh ya ini i thmu wei pynsñiaw yei kyrmen leh wa lyngba kani ka Dictionary daw yarap wow pynskem ya ki kyntien Khasi, ki rukom kynnoh wei kamjooh wow pynsñiawthooh yei yumut wa i thmu leh toh wow wanrah ya ka kam ka Online Dictionary.
