Ka khubor wa dang yoh chooh chooh yeiwa yoh kem ya ki 4 ngut kiwa lute Truck ha Ri-Bhoi District, da pyntip wa ki pulit ka Special Team ka Ri-Bhoi da pynman ki yei pynsangeh kari hajan Saiden wei heipor kamwa 4:30 da pyntip cha ki da uwi uwa yah Truck wa em ki bru wa lute Truck kiwa da pynsangeh wei dat ya kiwa yah Truck wei da dawa poisa ki ki leh ha Umtrew.
Yeini da pyntip cha u OC ka Umiam Police Station wa cha Umsning Police Station heiwa da pyntip da ki pulit ka Umsning wa em kawi ka kari Scorpio (rong lieh) kawa khlem em Number kawa da em wa yoo wa pynemkaam ya ka wow rahbor ya uwi uwa yah ya ka Truck wa em Number JH-02AK-9061 kiwa yut cheiliang Guwahati.
Kamtæ da booh thaw pynsangeh kari hajan ka Nongpoh Police Station wei heipor kamwa 6:15 dapoi kani ka kari Scorpio kawa phah pynsangeh tangwa da pyrchang ko wow tyrrah pathan ya ki pulit wa em heini da ka thong leh wow pynyap ki.
Neiliang ki pulit da sdang ki wow kdong ya kani ka kari tangwa da sangeh ko wei da hiar soo ngut ki bru kiwa da yut chapoh i khloo wa em hajan ka District Court heiwa ki pulit da yoh ki wow kem ya waroh kini ki 4 ngut wei da wanrah ki cha Nongpoh Police Station khlem da leh pyrchah ki.
Hawa takit ya kini, da phla ki wa khrong poisa ki wei da pyrchang ki leh wow rah bor ya uwi uwa yah Truck uwa tip kam u Prem Chand Kumar Mali uwa yah ya ka Truck wa da kdaw haneiñ.
Ya uni uwa yah Truck da yoh wow pynlait da ki pulit.
Kini ki 4 ngut kiwa chah kem toh u Pradip Gogoi (38 snem) uwa na Lahual, Dibrugarh District, Assam, u Tulan Phukan (36 snem) uwa na Nirkholoiguri, Sivsagar, Lakhimpur District, Assam, u Pranjal Gogoi (28 snem) uwa na Kakopathar, Tinsukia District, Assam wa u Deep Das (28 snem) uwa na Bugaghat, Assam.
Discussion about this post