Ka la-ær ha Meghalaya toh wow pynhær noh ya ka Congress nei synchaar: Nalin Kohli

Shillong: Ka Bharatya Janata Party (BJP) da ong ko wa ka Party Congress ym em bor de ko wow yakhun Election wei i yaleh Election toh du wow yada yei burom yong ka Party.

Hawa yaklam wa kiwa pathai khubor uwa e-ktien ka BJP wa pait ya ka Meghalaya, u Nalin Kohli da ong u wa ki paidbah da ngiah ki ya ka Congress hadooh ki seiñ saiñ pyrthai ha Meghalaya katni da yakhun ki wow pyndooh ya ka na ka jylla kamwa leh ha kiwi ki jylla. Da kam u leh wa katkam wa yoo u, ka la-ær kawa beh katni ha ka jylla toh kawa tikna wa ka Congress ym wan de ko heibor hadien ka Election 2018.

Heiyatoh wa i ong yong ka NPP wa ka ym toh ka jooh ka Party waka BJP wei da klam pyrchah ko leh ya ka BJP ha ki yalang paidbah, da ong u wa ym yoh yutip u iyi iyi leh chaphang ini tangwa ka NPP toh kawa emlang wa ka Sorkar NDA ha Delhi wei kamjooh ha ka sorkar synrop ha ka jylla Manipur wa ka BJP.

Da kyntait u leh wa ka BJP toh kawa pynchoi ya ka NPP wow wanrah ya ka No Confidence pyrchah ya ka sorkar u Dr. Mukul ha ka dorbar tlang ka wow sdang ha ka 8 tarik deiwa ong wa ka BJP ym em MLA ko hapoh ka jylla kamtæ kammon u tuklar ko ya ka Yungdorbar ka jylla.

Related posts

Ki paidbah pynbor ki ya kiwa mihkhmat wow wan cha ki yalang tangwa chah khñium won lada pynemkaam Siren: Paul

November 18, 2024

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024