U Montri wa pait ya ka chnat Puræ Puthi, u Rakkam Sangma hapoh ka yung dorbar ynne da e jubab u wa ka sorkar India ym pu em e ko yei mynjur yow booh ya ka Centre of Excellence for Sports tangwa da mynjur wow booh 38 tylli ki Eklavya Model Residential School (EMRS) hapoh ka jylla.
Hawa kylli yeini da ki MLA ka liang pyrchah, u Heaving Stone Kharpran wa u Brightstarwell Marbaniang, neiliang u Montri da pyntip u wa i daw wa pynslem ka sorkar pyrdi toh neidaw wa ki skur EMRS hapoh ka jylla ym pu ye wow pyndep u chna ki.
Da pynche u leh ki EMRS kattæ da em kiwa dang pynkhreh DPR wei em kiwa dang khut Tender.
Heiyatoh wa ki Centre of Excellence for Sports, da pyntip u wa da tyrwa cha ka sorkar India wow booh soo tylli tangwa ym pu em yoh yei mynjur hadooh kattæ.
Neibynta ki EMRS won da pyntip u wa emkaam thaw wa heh hadooh 8 Acre yow booh ya ka skur, ka Hostel, ka madan yalehke, ki thaw sah kiwa kreh wei kani ka thaw toh u yoh dei mynkna katkam ki kyndon.
Chooh chooh da pyntip u wa katkam ki kyndon, waroh ki Block da em hok ki wow em kawi ka EMRS kamtæ da tyrwa wei da mynjur ka sorkar pyrdi wow booh 38 tylli hapoh ka jylla heiwa ha kti ka sorkar jylla da em 23 tylli wei na kini 16 tylli dang khut Tender, 7 tylli dang pynkhreh DPR wei 5 tylli won ki wym pu yoh thaw yow chna ki katwa kiwi won da e kti cha kiwi wow chna.
Tangwa da pyntip u wa da em ar tylli kiwa dadep chna lut kattæ toh kawa em ha Samanda Block wa Pahamsyiem Block wei dang yang yei e bor ka Tribal Ministry wow pynkrehkaam noh ki deiwa booh ya kiwa sikai wa kiwi de kiwa emkaam.
Kiwa chitom u yoh thaw toh ha Laitkor Block, Mawryngkneng Block, Mylliem Block, Umsning Block wa Laskein Block.
Uwa yahkhmat ka Liang Pyrchah, u Mukul Sangma da e buit u wow thoh cha ki MLA kini ki thaaiñ yow yaklam ki wa kiwa chong chnong yow pynyoh thaw.
Discussion about this post