Jowai : Ka Social & Economic Life Development Committee (SELDC) yong ka Mowtyrshiah Presbyterian District kam chibynta wow kynmoo warom ya ka World Aids Day da pyman ko da ka Awareness Program hei yatoh wa ka HIV/AIDS ynnin ka 1 tarik ha Community Hall, Laskeiñ.
Ya ka yalang da pynman ha ka chnong Laskeiñ hei emlang u W.G. Sungoh MDC ka thaiñ wa ki paidbah wa em kamwa 300 ngut. Yei batai chaphang ka HIV/AIDS da e da ki doctor wa ki nurse ka Laskeiñ CHC wei da pyllai ya ka yalang da u Rev. H. Lyngdoh.
U WG Sungoh hei klam yong oo hei yatoh wa ka phang ha uni snem wa ong Hands up for HIV prevention da kyntu u ya ki paidbah wow yaksoh kti lang yow pyndooh jait noh ya ka HIV.
Neiliang kiwa kreh ka CHC da mihkhmat ka S. Lathong, PHN Laskeiñ CHC, ka Dr. P. Lamare wa u Dr. A. Hinge.
Ka S. Lathong da batai ko neiwon mih u khniang HIV wei kammon ktah u yei doh i pran ki bru wa em ya oo kamjooh leh ya ki laad wa ye u kiar yow lait u yoh kamjooh wow yada na u HIV.
Ka Dr. P. Lamare hei klam yong ka da pyntip ko cha ki paidbah wa emkaam u yait na i im wa thiah kurim kulmar wa kiwa boon ki bru, katwa u Dr. A. Hinge won da batai u ya iwa boon i ma wa mih na u HIV manda kylla ko cha ka AIDS, kamtæ da kyntu u leh ya ki paidbah wa ym toh u sarom ki u wan test ya ka HIV lada suba ki wa em HIV ki neibhah em ki dawai wa ye u pynneh yei im yong kiwa yoh HIV lada chem smat ya u khniang HIV.
Da saam leh ki kot hei yatoh wa HIV/AIDS cha ki paidbah yow sñiawthooh chooh chooh ki hei yatoh wa ini i kjut wa ki rwai tynre na ka LIMCO ka seiñ kiwa rwai tynre ha Laskeiñ hapoh i yahkhmat u Lasting Suchiang.
Da pynkut ya ka yalang da ki ktien e khublei na u Secretary ka SELDC u G. Dkhar
Discussion about this post