Jowai : Ka Jingiaseng Samla District, (JSD) Ummulong, West Jaiñtia Hills District, da pynman ko ya i lehkmen wa dap 175 snem (Dosquicentennial Celebration 1841-2016) ka Khasi-Jaiñtia Presbyterian Assembly. Ya kani ka lehkmen da pynman da yakop Football ha Madan, Football Mookyndur kamjooh wa ka lympung Singing Festival ha pchem ka Ummulong Presbyterian Higher Secondary School, Ummulong, ha ka 8 tarik Naichiphaw.
Ha chwa wow sdang ya ka lehkmen ha ka tai ka sngi da em leh ka Praise and Worship wa ka yaseiñ kawa pyllai da u Pastor In-charge Rev. N.S. Phawa, hei emlang u Rev. A.L. Laskor uwa man kam u kongsan, Rev. Rihok-I-Oo Laloo, u Donbok Passah Chairman, u Ribok Laloo Secretary ki dkhot ka Jingiaseng Samla District, Ummulong, ki Waheh Wasian ka District, u Acting Dolloi Elaka Maskut u ma Phrangki Rynjah wa kiwi de kiwa chah khut sniawbha ha ka Balang.
Ha ka yakop Football da wan yachim bynta da ka Jingiaseng Samla District Ummulong, ki Dkhot Committee Balang hapoh ka District, Jingiaseng Samla Balang Presbyterian Ummulong, Maskut, Mookyndur wa Madur, kiwa yachim bynta da ki khynroo wa khyllood.
Ha ka yakop Football yong ki chynrang, ka Jingiaseng Samla Mookyndur da jop ko ya ka Jingiaseng Samla Maskut wa ha yong ki kynthai won, ka Jingiaseng Samla Mookyndur da jop ko ya ka Jingiaseng Samla Madur. Ki Dkhot Committee Balang hapoh ka District Ummulong da jop ki ya ki Dkhot ka Executive Committee kiwa em hapoh ka Jingiaseng Samla District, Ummulong.
Ha ka tai ka sngi da pynkut ya ka lehkmen da ka yaseiñ duwai heipor janmiet, kamjooh da ka Singing Festival wa yah khmat da ka Saving Sound Band na Nongkrem. Ya ki khusnaam cha ki wa jop ha ka yakop Football da saam da u TBn. S.Mukhim, TBn. S. Nongpluh wa u TBn. N. Kharlukhi.
Discussion about this post