Jwai: Ha kani ka sngi wa pynemwarom yei dap 69 snem i ioh laitluid ka ri India, ha sor Jwai, da wan wow ia sakhi lang wa ki paidbah daka kong Dehborah C. Marak wa pait iaka tnat Social Welfare, Animal Husbandry & Veterinary, hei ia emlang u Deputy Commissioner ka West Jaintia Hills, u A. Kembhavi, u Superintendent of Police u R.Muthu, ki sahep sorkar naki tnat krehkam wapher wapher, ki nongsikai wa kiwi kiwi.
Ka kong Deborah hawa e ko yei klam da e khublei ko ia ka jylla waroh kawi, khamtam ia ka rilum Jaintia wada ioh ko u ia emlang ha kani ka pynemwarom wa 69 i iohlaitluid ka India.
Heijuh i por, da iaroh ko leh iaki bru ka Jaintia deiwa ong wa man ki ki bru wa iatylli. Kamte i iatylli man i wa emkam bha neibhah heiwon heiwon i kam lada em i iakrehlang ha pyrdi ki tnat krehkam wapher wapher, ki nongchong chnong haka imlang sahlang kamjuh waka sorkar iwon iwon iwa thmu daw man i iwa jop.
Da kdaw ko leh wa ha jaintia dang yoo chong hok i pynemwarom ioh laitluit neibhah dang man ko ka thaw wa rap chngain, dei wa iaujor ko wa ka Garo Hills kawa em du hei tein hei khian mynsien neidaw wa jia i chah pyntein chah maham, kamjuh ki jing jia wa sniaw chyrkhei neipor cha i por wa juh leh da ki GNLA. Kani pynyoo ko wa ha Garo Hills ym phu em iahap ki u pynemwarom sngi laitluid.
Ia ka parade ha kani ka sngi da iah khmat da u Additional Superintendent of Police u ma S.Syrti, hei iachim wynta lang daki phaw tylli ki skur wapher wapher ka sor jwai.
Hadien wada dep i parade da em won i iachim wynta ki khynnah skur, ki dong wapher wapher hei chad i rwai kamjuh i drama tbian naki Scout ka Nangbah.
Da em leh i sam iaki khusnam cha ki nongjop wapher wapher wa iachim ha kani ka sngi heiwa iei nam wa nyngkong da ioh daka Seiñ Raij, wa ar daka Lumpyrdi Iongpiah, wa le won daka JNV. Haka March pass yei nam wa nyngkong da iohrah daka Government Goys Higher Secondary School, wa ar daka Tome Memorial Secondary school wa le won daka Amwi Higher Secondary School katwa ka khusnam wa kyrpang won ioh da ki scout Nangbah haka drama wa tbian iong ki hajrong ka phang Child Labour.
Kamjuh da sam iaki khusnam cha ki chnong kiwa hap hapoh ka Swatch Bharat Mission, wa da ye ki u pynkrehkam hok iaka scheme cha painkhana haki chnong iong ki.
Da sam leh iaki khusnam Child Labour Free Village cha ki artylli ki dong iong ka chnong Changpung ka Changpung Pohchnong waka Changpung Mission kawa man ka Model Village hajrong wa u Deputy Labour ka West Jaintia da chem u wa kani ka chnong toh ka wym em de kite ki khynnah kiwa likhih mylla hei rta wa dang khian.
Neiliang ki officers club ha kani ka sngi da pynkup warom kileh iow Wanbianghi Lakiang uwa man u khynnah wada jop iaka matrik iong oo ha uni u snem deilang 5 tylli ki distinction han la ha pyrdi i kreh chitom iong oo wow iarap iaka bei iong oo u li dai tpu hali, tpu nai, tpu khlain wakiwi ki jaitbam chhwa wow lai skur u kamjuh hadien wada wan skur u. Kamjuh ki officers club da iarap kileh ia oo waka poisa 50 hajar nei wynta u ioh iarap u hei purea iong oo. Iaki khusnam dasam daka kong Deborah Marak.
Natlor iong oo da pynkup warom leh iow Heirtami Paswet u khynnah wada poi chakhmat haka examin secondary school wa da dep.
Ia kani ka pynemwarom sngi laitluit, ha khliehriat leh da sakhi wa da pynemwarom ki ia kani ka sngi heiwa da wan u sakhi da u A.T Mondal u speaker ka Meghalaya Assembly hei ia emlang ki ophisar ki tnat krehkam wapher wapher.
Heini da wan u iachim wynta haduh kamwa 17 tylli ki skur wapher wapher. Da iachim wynta leh ki khynnah skur hei rwai i chad wa kiwi kiwi ki jait ialehke, kamjuh leh da em i iakop rwai iakop chad tynre ha kani ka sngi wa da chim wynta daki khynnah skur.
Ha ka march pass ka Holy Family English School Khliehriat da ioh ko yei nam wa nyngkong wan wa ar ka Ambrose Memorial Secondary School Khliehriat West. Ha ka cultural prokram ka Goodspherd Secondary School Ladrymbai da ioh ko yei nam wa nyngkong, ka Khliehriat Higher Secondary School Khliehriat wan ko heiwa ar, katwa ka Hedalis Corner UPS Rymbai wan ko hei wa le.
Hawa khyruin won cha ki luti ki syngkein ha kani ka sngi pynemwarom sngi laitluid ka ri India, ha Jwai da sakhi wa rap lyngam hi ki iaw ki hat hawa nujor wa ki kiwi ki sngi, neibhah ki dukan leh boon kiwa khang, kiwa wai kiwi duh wi ar donhi wa wai kam ki Pharmacy, thaw dai doh sniang ha thaw yein kari Nangbah wei thaw dai jhur, wa ki wi ar ha iaw chiap. Ki local taxi leh bun hi ki, katwa ki kari tourist won duna ki.
Katwa ha Khliehriat won ki luti syngkein ki surok lyngam bha ki neibha ki dukan waroh da khang em su wi ar don hi ki kari walai wa wan.
Ha kani ka sngi hadien wada dep i pynemwarom Independence Day, da em won ka concert wa ka lehke stunt bike ha Iawmusiang, Jwai marpyrchah thanat.
Discussion about this post