Da: U Kerlang Ksoo, Dkhiah West, East Jaintia Hills District
Ka jingshah ieh khunswet jong ka East Jaiñtia Hills District ha ka sorkar jylla Meghalaya nalor kiwei kiwei pat ki jingduna hapoh ka District mynta la kumba ar taiew eiei naduh ba la kynriah kam noh ia u Deputy Commissioner barim ha ki taiew ba lah dep ka long ka bym lah satia ban pdiang da lei lei ruh em bad ha ka jaka ban thung da u Deputy Commissioner ba pura, la shu thung sieh da u Additional Deputy Commissioner khlem ka bor ba biang pura ha baroh ki bynta ban peit ia ka District. Ka long kaei re kaei ka bym sngewtynnad ban tip ba nalor ki jingduna ba bunjait ha ka roi ka par hapoh ka District, mynta pat sa u khlieh nongkit nongbah ruh la pynduh jubor na ka District. La pynlong noh ia ka District ba kan kylla thik kum ka lieng khlem u maji.
Nalor ba la tlot shuwa ha ka roi ka par ka thain da ka jing ieh khunswet ka sorkar, Ki kam pynroi ba dei ban pyndep la shu sah teng ei. Ki kam sorkar ba kyrkieh bad ba donkam ia ka bor u Deputy Commissioner la sahkut ei. Hato ka sorkar ka don jingthmu aiu sha lyndet ban ieh khunswet ia ka District? Kane ka sorkar jong u Conrad Sangma ka la lehkai bad leh khlieh-shrieh shaba palat shisha ia ka thain Jaiñtia Hills jong ngi la jan ha baroh ki liang.
Kum u nongshong shnong ba don ka jingkitkhlieh na ka bynta ka bha ka miat jong ka District bad ka thain hi kumjuh nga da sngewkwah ban pynpaw hangne ba hapoh ka District, ia ka hok u paitbah la shu leh kai da ka sorkar katba ka mon. Ka hok ban ioh ia u surok uba bha bad uba bit ba biang sha ki shnong ki thaw ruh ym don ba khmih, ia ka jingdonkam ban ioh umbam umdih ba biang sha ki shnong ki thaw ruh ym don ba khmih, ia ka jingduna ha ka pule puthi bad lada i jingsumar ba biang ruh ym don ba khmih, khlem da niew sa kiwei de ki jingduna shaba palat ha baroh ki liang, hynrei mynta sa uba dei ban khmih ia ka District baroh kawei ruh la knieh noh na ka District. Hato kane ka sorkar ka matlah bad kyllut ia ka thain Jaiñtia? Hato kane ka sorkar ka ai jingshakri ba pura tang ha ki thain Garo? Lada kumta, ka mut ki ‘riew khraw pyrkhat jong ka jaitbynriew jong ngi kiba shong man ka sngi ha Secretariat ban mihkhmat ia ngi ki shu kylla nongbud pynban ia uba don ha ka bor ha ka jaka ban iasaid na ka bynta ka iap ka im u duk u suk. Lada kumne, shaei ka lawei ka thain kan poi?
Related posts
Sa kawei ba nga kwah ban pynpaw bha hangne ka long ia ka jingduh mynsiem ban tip ne iohi ia ka jingdon jong ki briew ba duna ha ka bor pyrkhat pyrdain (Mentally Challenged Individuals) kiba shu iaid sakma sharum shaneng ha ki surok bah (NH-6) Lad Rymbai bad Khliehriat khlem ki bor ban peit ban i bad ban sumar ia kine ki para bynriew wat halor jong ka hukum ka iing Kashari ba donburom jong ka Meghalaya High Court lyngba ka PIL No.1/2015 ia kaba la pynmih ha ka 27-04-2015 ba la phah ia baroh ki nongpyniaid District ban peit bad ban pynthikna ba ym dei ban shu ieh ia ki briew kiba don ka jingduna ha ka bor pyrkhat pyrdain ha ki jaka paitbah lane ha kino kino ki jaka kiba lah ban buh jingma ia ki bad buh jingthut ruh ia ki paitbah ba iaid ba ieng. Ka sorkar lyngba ka tnad ba dei peit ia kine ki briew ka la dei ban pyntrei hok shisha ia ki lad ai jingiarap sha kine ki briew.
Ka iing treikam jong u Deputy Commissioner ryngkat bad ka tnad Social Welfare Department ki dei ban burom ia ka hukum ka iing Kashari ba donburom bad ban khmih bniah ia ka jingdon kine ki briew ba shu iaid sakma sharum shaneng khlem ki lad jing iarap. Sngewtynnad ban iohi ia ka jingsbun jong ki nongshong shnong kiba don ia ka mynsien para bynriew bad sngewlem ban iarap ia kine ki briew da ki jingbam katba ki sngew lah kot bor. Kan long jin kaba bha tam ia ka ophis treikam ka DSWO hapoh ka district ba dei khmih ia ka bha ka miat ha ka imlang sahlang ban ai jingiarap wut wut bad ban pyntikna ruh ba kine ki briew ki ioh ia ka jingsumar bad jaka sah jaka dem katkum ka hok ba ki dei ban ioh.
