Jowai : Ka Seiñ Raij Mukhla da pynman ko ya ka lympung wow sneiñ wow kyntu ya ki khon ka Seiñ Raij Mukhla wei ha kani ka sngi leh da pynman ya ka kawa kyntang deiwa yoh pyllait ya ka kot Lehniam ka Seiñ Raij Mukhla kawa da pyllait da u R.M. Garod u Dolloi ka Elaka Nangbah.
Ynne ka sngi leh da man ko kam ka sngi dap chi snem ka skur sikai niamtre yong ka chnong Mukhla Shohshrieh.
Heiwa sdang ya ka yalang da yoh ya i pynhær ya ka lama da ka manbei wa da heh rta ka Lisi Sari hei emlang kiwa kitkaam niam ka Raij Mukhla nadooh u Langdoh, Waheh Sari, Waheh Suna, u Chutia wa kiwi kiwi de.
Ya ka lympung da pyllai da u Ram Suna wei da yoh leh yei klam na u P. Orlando Sari u waheh chnong ka Mukhla Shohshrieh hajrong ka phang “Ka pateiñ ha ki khynroo khyllood”, u Kamnipaia Challam da klam u hajrong ka phang “Ka Shlem Hikai Tynre”, da yoh leh i klam na u Ket Suna hajrong ka phang “I rukom leh niam hapoh ka Raij Mukhla”, u Wanbha Lyndoh u Langdoh Niam ka Raij Mukhla da klam u hajrong ka phang ka “Akor ka Burom”, na ka Yoobha Sumer, President Sengkhynthei Sein Raij Mukhla da klam ko hajrong ka phang “Ki kaamram ka Kchu ka Siang ha ka Niam ka Rukom”, na u Mario Biam, General Secretary Seiñ Kyntu Seiñ Raij 12 – Daloi da klam u hajrong ka phang “ka Niam u Hynniawtrep Hynniaw skum ha ki khon ki ksu”.
Ha kani ka sngi leh da yoh leh ya ka Chaad Tynre na ka chnong Mukhla Nongrim, Shohshrieh, na ka Seiñ Raij Shnong Madur Raij Tuber, na ka Seiñ Raij Wahiajer wa na kiwi kiwi ki tnat ka Seiñ.
Da wan sakhi leh ya kani ka sngi da u Hame Phawa President Seiñ Raij Khliehtyrshi wei da yoh ya ki ktien e khublei na u Heimonmi Bhoi, ya ka Cultural Programme da pyllai da u Ryngkatlang Sari wei da pynhiar ya ka lama ka seiñ da ka manbei wa da heh rta ka Lak Suna wei da pynwai ya ka Lympung da u Ram Suna.
Discussion about this post