Kiwa yahkhmat ka HSPDP ynne ka sngi da lai yachem ki wa ki heh yong ka Atomic Mineral Directorate (AMD) yow paan pynche hajrong i mih biang ka phang Uranium ha ka jylla.
U President ka HSPDP, u KP Pangniang da khana u wa da lai yachem ya u Regional Director yong ka AMD, u Dr. Prakhar Kumar ha yung krehkaam yong oo wa em ha Nongmynsong, wei da paan pynche lada ka sorkar India dang em namo ym em ko yei thmu wow tih ya u Uranium na ka jylla Meghalaya.
Da khana u wa da klam che wa ka AMD man ko kam ka Ministry kawa pait yei em ki marpohkhyndaw ha waroh kawi ka ri, tangwa kawa pait yei tih Uranium toh ka UCIL, wei da ong u leh wa ka sorkar India ym em de ko yei pynkhreh wow tba biang ya u Uranium ha kani ka thaw.
U Pangniang da ong chooh chooh u wa i rai wa da chim da ka sorkar u Dr. Mukul Sangma ha u Naisaphra 2016 da klam che wow pyndam noh yei thmu u tih ya u Uranium na Domiasiat kawa haap ha South West Khasi Hills District.
Halor ini da ong u leh wa ki heh yong katai ka chnat da kular wa ka Meghalaya ym em de ko ha ka Map wow tih ya u Uranium.
