Ka yakob miat kynthai wa tip kam kam ka Miss Jowai Pageant 2023 kawa daw pynman ha u bnai December uni u snem daw man ko kawa rap phær na ki snem wa nachwa katkam i yooluti wei pynkhreh ki bor pait bor pynlai yong ka, katæ toh ka Diza’s Socio & Sports Club chirup i krehlang ka A&G Enterprise.
Kamwa ka Miss Jowai Pageant man ko chibynta i lehkmen yei miat, i chemphang wei pynkupbor, ka phang yong ka ha uni u snem leh ong ko “Empowering her: Grace, Culture, Sustainability” iwa mut ka thong toh u pynkupbor yaki kynthai ka Ri-loom Jaiñtia lyngba ka rynsan yow yoh laad ki u pynyoo yei man kyrpang yong ki, i man chlur wei i wow man myntoi leh yaka jaitbru.
Katkam i pyntip naka President ka Diza’s Socio & Sports Club, ka E.E. Laloo, wa u Dr. Elvee Marbaniang, Secretary Diza’s Socio & Sports Club wa u Aris J Nongkynrih A&G Enterprise, Event Partner ong ki wa ha uni u snem yaka Miss Jowai ym pynman de hapoh Hall tangwa cha ki thaw ki madan wa heh neibhah wa daw em ki dukan wa boon jait wa yatoh wei tynre la ha ki jait baam, jait chna, ki tiar wa kiwi ki jait wa wanrah i tipmit yaka jaitbru.
Neitæ i daw em leh i pynyoo rong yei sap i phong da ki khynroo khyllood nadooh i rwai, i chaad, i tem i put, ki jait dro wa kiwi ki sap wa pynmyntoi yaka imlang sahlang.
Tangwa yaka thaw wow pynman kamjooh ka tarik, ka Diza’s Socio & Sports Club daw pynbna won ko hadien.
Ka Registration neibynta kiwa kwah u chimbynta da wai nadooh ka 28 tarik u August hadooh 30 tarik September 2023, wei ka Audition u man ko haka tayaaw wa nyngkong u October, wei hadien ka Audition daw em leh ka Personality Development Training Program.
I rta kiwa ye u chimbynta toh 18 hadooh 27 snem (27 snem kat hadooh ka 31-08-23), i jrong toh 5’2″ chaneiñ khlem sap juti jrong khyndong, wei toh u man leh kiwa dang samen (Single), ki wym pu em pynskhem bia (Not Engaged), ki wym pu em bia (Unmarried) wei wymtoh leh kiwa da jooh bia (Never been married before).
Toh u man leh kiwa chong chnong wa pura ka Ri-loom Jaiñtia næ kiwa man kam ki Pnar hi hanla chong sah ki cha kiwi ki thaw deiwa pynsakhiat leh yei em ya ka Schedule Tribe Certificate.
Neibynta u tip wa bniah ye wow Phone ha kini ki Number 7308039554/8257948971/9862040744 næ e-mail ha [email protected].
Hawa yoh u yaklam waka Miss Jowai kawa jop ha u snem 2018 (iwa man leh i sien wa khaddooh wa pynman ya ka Miss Jowai), ka Lameca Passah kawa na Loompyrdi Iongpiah, Jowai khana ko wa lyngba i chimbynta haka Miss Jowai sñiawthooh ko wa da yoh ko boon i myntoi hanla wan i chah pynthut ka Lockdown.
Ong ko wa ka toh kawa jooh sarom bru bha nachwa, tangwa nadooh wa chimbynta ko haka Miss Jowai, katni da sñiaw chlur ko u yieñ rynsan hakhmat paidbah wei wym tieñ de ko u mih rynsan kat hawa em.
Da lai man ko kam ka Model ha ki thaw wapher wapher neitæ da jooh chim bynta ko haka Miss Shillong, da jop ko leh yei naam Face of Butterfly wei hadooh katni dang yakrehlang ko waka Butterfly Collection ha Shillong. Da jooh man ko leh kam ka Brand Ambassador hapoh ka chnat Election yow pynchlur ya ki khynroo khyllood wow wan thap Vote ki.
Kamtæ kyntu ko ya kiwi ki khyllood wow mih ya chimbynta ki kam ha kani ka rynsan neibhah kani man ka laad wa e myntoi ha kiwa boon ki liang wei ymtoh u pynsepai yaka laad wa da yoh.
Puræ leh: Rah ka Lameca A Passah yei naam Miss Jowai 2018-19
Discussion about this post